高清睇跑馬：智友值過百分

港陌

　　第十一場一班1600米，「智友」轉投方嘉柏馬房表現出眾，除首戰未有表現，打後十二戰全部殺入前五名， 取得六冠兩亞兩季，最厲害小方部署出神入化，先係冇戴罩取得兩W，之後輸一次立即加戴眼罩，獲得兩勝三位佳績。今季又作出改變唔戴眼罩，成績如何？三戰兩冠一亞，亞軍一役為谷草一哩排十二檔，被迫留在後叠，轉彎兜出大外檔形勢極之不利，至於兩場頭馬均屬高水準，前仗負131磅輕取「福到多多」。上仗總場次 238谷草二班1650米仲誇張，不單止首戰二班即勝，仲要沿途走三叠蝕位無數，並在慢步速之下後上取勝，肯定是匹評分值逾百分好馬，元旦日回師起家田草賽事，1600米也合發揮，對手非強值得再追。

新三刀王水準高

　　另外，第三場四班1200米，「新三刀王」上季新馬兩戰表現平凡，今季晨課也未見太大進步，編班首戰四班直路賽走勢欠奉，也理所當然，然而上仗再爭四班直路賽，且首次採取主動跑法，卻大有進步跑近而回，最終以第六名過終點，只落後「領航人」兩個多馬位。

　　睇番該戰對手更嚇了一跳，比牠先過終點的頭五名馬匹，全部接戰躋身前列而回，頭馬「領航人」打叠贏馬，「醒目精英」和「好辣椒」翌戰在劣勢之下殺入亞席，反映該戰賽事水準極高。

　　既然「新三刀王」剛戰水準高，且牠已仄準前速，排在五檔起步亦有望盡早進佔內欄好位，沿途且戰且走不難殺入前列而回，半冷馬當然值得追捧。

Sam