楝悉先機：頭盤強勢回歸

魑魅魍魉

　　執筆之時，天文台預測，今日天氣寒冷、多雲及有幾陣雨，咩時候會落雨，好難講，但千祈唔好跑緊馬落雨，因為賽果易扭曲，最慘仲係嗰班馬房助理，已經凍到頭耷耷，如果落埋雨，喺亮相圈拖住隻馬出嚟，真係難頂，所以話，喺緊張刺激嘅賽事背後，佢哋其實係無名英雄，值得「耍冧」。

　　第三場四班1200米。「競駿寶寶」上場加眼罩縮程跑直路賽，章法唔似阿蔡一貫作風，跑得冇想像中咁好，其實唔係意外。今場又同馬迷玩鬥智遊戲，唔等沙田賽期，走嚟谷草。但個人唔見得此舉係想同隻馬「降溫」，因外界明知超級，跑咩地唔慌會冷，應該係正面部署，希望排到好位可令此駒易應付此程。

卡加精神博好分

　　第四場四班1000米。「卡加精神」回降四班，卻不等正宗的1200米，反之，轉到未有根據的1000米，阿航點會有咁嘅部署，唯一係博賠率，而睇隔夜飛，獨贏有接近10倍，睇嚟縮程達到「趕客」作用。說到此駒實力，四班短途能勝「皆大歡喜」，點會冇班利。

　　第八場三班1800米。馬房手足告知，「頭盤」季初贏完此程，狀態係有回落，所以，表現未可接軌。嚟到季中，進度又重新納入正軌，就算上場在田草，直路又曾經塞車，一樣跑得好，反映勇態已備。今場即回到勝途， 睇大摩部署， 應是落點所在， 如果唔係，大可等沙田賽期去捱打，呢場還要用番主帥，更似係真波。

點買法

　　坦白講，「競駿寶寶」寫還寫，但要買落去，兩倍唔多合胃口， 要博不如博「頭盤」WP，睇隔夜飛，P仲好分過「競駿寶寶」獨贏，阿棟唔係貪，不過賭馬要數口精，值博與否，係一大考慮問題。至於重心Q，都係尾場， 由於預計有啲肉食吓，可補埋PQ。

陳華棟