洪禮賢講馬：「預視功能」又顯現

港陌

　　早前曾經提及，「有買早、冇買錯」嘅現象，周中夜馬又「顯靈」！

　　周三晚8場賽事上陣馬當中，喺對上1場臨尾跌飛超過25%嘅馬一共有5駒，分別係「快馬當先」、「尊皇騰龍」、「滙名燈」、「愛睦善」及「頭盤」，結果呢堆馬名次最差都有第四，總成績為2冠1亞1季1殿。換句話說，佢地喺之前1場忽然大幅跌飛，唔係冇「預視功能」！

　　雖然，偶有大幅落飛馬中得好應，作為雞仔注嘅馬友（如我），感覺好似畀人削去「忽」肉， 心水冷馬竟成熱， 又或者有被打刧嘅feeling！要知道呢個係自由社會，彩池大小和增長，唔到我地話事，有時搶咪搶囉，最緊要有得中，阿Q精神嘛，好過輸埋！而呢類馬既然衍生出「預視功能」，確有參考性。

　　洪某唔係鼓吹盲從附和，邊隻上場大幅跌飛，下場即刻瞓身去跟，因從來唔認為賽馬遊戲係咁玩，如果係咁嘅境況，過大海買大細、百家樂好過啦！但不妨作為參考因素之一，以「尊皇騰龍」為例，之前落飛唔係冇成因，早於上賽前已指出，頸梗及岳頭跑姿係有改善，所以，上賽臨尾嗰舊銀紙唔係無啦啦堆落去。

點心爆得

　　今期田草十場賽事，重頭戲係速度系列首關，「蓮華生輝」失落國際賽，轉頭對番本地馬，高晒！反而，同場邊隻有能力博腳有得諗吓？！初步對於「點心」略有好感，一連兩場放起上嚟好有速度感，縮短200米，對手一追唔切，爆得！