高清睇跑馬：揀得準用到盡

港陌

　　告東尼接手「揀得準」不久已派其上陣，一月一日出戰田草1200米，十四檔起步沿途走三叠，甚至冇遮檔跟跑而回，但要留意一早報名四日後的谷草1000 米，雖然兩戰同樣冇用王牌及優先出賽權，不過東廐馬絕少匆匆報名，反映箭頭早指之後一戰，即總場次296五班1000米，落重飛搏殺，更吸引的是，六檔起步本來形勢不俗，卻因為內檔大把馬，被迫頂出外檔，全程望空兼走三叠，難得身處劣勢，直路一樣爆發出極強後勁取勝，反映水準甚高，勝後僅加五分便宜莫甚，東廐馬好開就好，低班馬更唔會留手，今仗改攻泥地1200米，縱使佳績欠奉，一樣可追捧。

如願以償質高早熟

　　「如願以償」上季兩歲已出戰，蔡廐馬極之少見，質高早熟貨色，首戰田草1000米已一擊即中，接戰增程1200米再建一功，贏開1000米之馬，增程1200米唔易再贏，但牠尚可輕鬆挫敗強手，優厚質素盡顯，就算季尾一戰滑遭滑鐵盧，但該役插班初出，尚要跑三班及首戰谷中，落敗亦合理，老蔡唔忿氣，今季一於再到谷中搏過，打叠排十一檔及十二檔，分獲冠、季軍光芒四射，或許連場硬仗，前仗再排九檔蝕唔起偶然失準。

　　「如願以償」上仗跑番田草三班1200米，即總場次292，此役際遇不好，要搵遮檔才跑得好之馬，沿途三叠望空，最後仍能拼入殿軍，尚要負重磅躋身前列，確認大把進步空間，周日有場1000米更係其贏馬路程，偏偏轉戰1400米，部署有心思，值得追多次。

Sam