馬主論戰

港陌

御鋒係時候交代

　　葉楚航今晚手馬幾惡，我估佢可以贏馬，甚至起孖。先吼實第二場「御鋒」，來港八戰未贏過，但上場跑直路賽明顯有進步，輸畀「尚駿心」跑第二，走來有前有後，今次轉跑谷草排埋一檔，可以贏馬交代。

　　另外，尾場「闊袍大袖」上場贏得「愛睦善」、「自家威」，依家個分肯定仲有着數，復課後韋達成日摸住操，簡直當寶咁，應該穩食尾胡。

張敬山

精算攻略演出準

　　雖然蔡約翰今晚出馬唔多，但我都睇好佢有馬贏，先吼實第四場「競駿寶寶」，上場初跑谷草居然捧到兩倍唔夠，擺明台前幕後信心十足，結果真係順利贏馬；有過場地經驗之後，今次表現肯定更進一步，連捷冇難度。

　　另一匹要留意嘅蔡廐馬係尾場「精算攻略」，近四仗全部非勝即位，演出準兼近況勇，若然因改配潘頓而換嚟合理分頭，更加要吼實。

任達華

福到多多換人贏

　　柏寶停賽復出以嚟，每次都起孖兼捧盃，真係夠晒威水，賭馬向來跟紅頂白，吼住佢實冇錯。推介第七場「福到多多」，近兩場跑谷草一哩都交出後勁上名，換柏寶上去係時候贏番一場。

　　另外第三場「軍士」都要留意，前仗初戴眼罩即刻開齋，上場走外叠輸咗唔使太介意，今次轉嚟谷草上陣，換番馬房愛將柏寶操刀，應該會有唔同演出，隨時可施回馬槍。

寇鴻萍、梁廷鏘