洪禮賢講馬：衝擊三冠還看方摩

魑魅魍魉

　　由於日前受人恩惠，點都要喺呢個框框講句多謝。事緣有日內子與友儕飯局（洪某不在場），向來與該店相熟，或因店內員工與另一枱客人傾開偈，又講開馬，咪話：「嗰枱客個老公咪係洪禮賢。」就係呢一句，另一枱客就請咗內子等人食飯。後尾內子問番店內員工究竟發生咩事？原來那枱客人，曾經因洪某敝報嘅貼士而有所收穫。呢件事係美麗誤會又好，定係那人好客也好，喺度都要說聲多謝。其實，做了呢行接近廿年，還是首次發生同類事件（可能條命冇乜口福），開心唔係因為食飯唔使畀錢，而係起碼有人睇自己。其實輸贏，已經睇到化（我又唔係買得大），個人滿足感除咗喺賽後威水版有時會搵到之外，就係知音者。就算有百人插你唔緊要，起碼知道仲有人支持，也覺心甘命抵。

　　正如之前有讀者來信讚嘉豪，洪某即時轉達，仲叫佢醒定啲、揀好啲！因有人真金白銀咁跟佢大題。所以，之後佢不知幾細心去選擇賽日大題。正正係有知音者作為一股力量，我們更會付出多一分努力，到頭來貼士得唔得，真係冇得寫包單，但起碼做到有heart呢一點！

唯獨翠河做得到

　　呢期重頭戲董事盃，真係新舊勢力交替嘅一屆，究竟有冇馬可以繼十幾年前「翠河」後攞晒三冠？其實呢個問題年年都係咁講，但近屆最叻已係「爆冷」，試過三關裏交出2W1P。睇過今屆嗰批馬，成數最高應該係方摩兩廐「自由好」或「魔法幻影」，尤其係後駒，國際賽一役已印證過能力。

馬會賽馬節目主持　洪禮賢