洪禮賢講馬：意頭馬概念唔諗唔得

猪拉多纳

　　埃及動盪震散港股及外圍市場，全球一體化，有辣有唔辣。佢哋各省愈係多人上街示威，政局愈係唔穩，將會幾時收科真係冇人知。不過，呢類新聞可不時炒作，作為「質」低經濟氣氛嘅妙藥。

　　至於賽馬世界，馬迷唔會上街示街，騎練唔會出嚟「揮」最低工資，馬主唔會遊行爭取提高獎金，出現疫情機會亦唔大，「政局」向來算係安定。唯一出現動盪場面，就係賽事中啲「沙石」！如果吹沙入眼，理所當然會整親隻眼，睇得唔舒服。若果出現1場又1場扣人心弦賽事，鬥得燦爛，個個馬迷睇完拍手掌都嚟唔切。但1場接1場「沙石」賽事嘅話，趕客、火滾、咒罵、抱怨、懊惱等等，上述詞語總有1款用得着！

　　之前有兩位騎師被重罰，會收到阻嚇作用，此後會唔會風平浪靜，冇人敢擔保。但歷史講畀我哋聽，假以時日，又會出現「沙石」賽事，只係離譜程度、出事位、動機或主角唔同，結局沒有兩樣。

大摩幸運多多

　　嚟到大年初三賽事，熱熱鬧鬧，跑夠11場，新正頭，唔理華人定洋人，個個重視意頭，攞頭彩、意頭馬、旺門騎練／冧吧等概念，應運而生，當日想唔諗都唔得。至於近年同日賽事，兩大馬房摩東，時不時有W到手，明顯係新年先鋒。咦，望望佢兩個嘅報名馬，「幸運多多」及「大家勝利」， 意頭利是而賽績ok，孖住贏嘅話，中得到，真係兔年好。

馬會賽馬節目主持　洪禮賢