朗尼轉運腳風順 曼聯勢兇夾狼

魑魅魍魉

05/02/2011
文： 走肖

首先祝大家兔年過肥年，狼隊喺大年初三「赤口」主場對曼聯，千祈咪拗頸，過年最緊要好意頭，呢場曼聯就有機會攞威，打破球會史上最長聯賽不敗紀錄嘞，再加上朗尼翻生，貝碧托夫又生性，冇理由唔追紅魔2.1倍「讓球客勝」。（有線201及301、廣東體育周日凌晨1:30直播）


今季曼聯冇咩大手筆收購，相信冇咩人估到佢哋可以喺聯賽長期領放，依家以5分騎住第2位嘅阿仙奴。日前紅魔喺主場以3:1打沉阿士東維拉，追平球會嘅聯賽 29場不敗紀錄，期間有19勝10和，今場贏埋嘅話，就可以揭開連續30場聯賽不敗新一頁，你話幾威呢？相信領隊費格遜唔想掃興啩？

貝碧領先射手榜

仲有呀，朗尼對維拉終於發威梅開二度，做前鋒最緊要有信心，相信佢嚟緊會入球滾滾來，更何況佢拍檔貝碧托夫以19球喺射手榜領先，為咗洗脫Hea王污名，對住狼隊一定唔會留手，而且爭住攝位上陣嘅查維亞靴南迪斯同奧雲，最近都有波入，狼隊擋得到一個，都擋唔到第二個啦！

狼隊殘陣3連敗

講到狼隊就慘咯，中場史堤夫亨特養傷，搞到冇人負責策劃攻勢，對上3場全敗兼冇波入，最令領隊麥卡菲氣頂係羅致利物浦左閘高捷斯基同熱刺中堅活基治計劃失敗，解決唔到防線問題，就算借用到熱刺中場奧哈拉都冇用，睇怕狼隊難抗曼聯。

狼隊落敗率冠英超

‧英超輸波最多，24戰得6勝3和15負。


‧連續5場開入球單。

紅魔對賽全勝

‧對上6次對賽全勝，攻入13球。

‧貝碧托夫暫時以19球領先射手榜。