馬主論戰

魑魅魍魉

陽明深心食尾胡

　　今日係大年初三，先祝各位《成報》讀者橫財就手、心想事成！全日重頭戲之一主席短途獎，相信都係「蓮華生輝」世界，上場對番一眾本地對手即輕勝，始終卡士都係高啲，繼續跑平磅賽，再贏冇難度。另外吼實尾場「陽明深心」，上場贏得「軍事行動」，實力絕對唔講得笑，繼續跑二班賽兼且負磅唔算太重，估計會係馬房主力所在，一於吼實。

張敬山

飛闖愈跑愈進步

　　大摩今日成棚惡馬，其中兩場盃賽各有三駒上陣，點睇都係想響大賽日攞威。第八場短途主席獎，三駒之中鍾意「點心」，上場跑冇咁耍家嘅1000 米，亦只係輸畀「蓮華生輝」唔夠一個馬位，今次回師贏過兩次嘅田草1200米，有權反先對手。至於賀年盃嗰場，「飛闖」近兩戰全勝，擺明愈跑愈進步，四歲馬依家跑1400米仲啱，有權捧盃。

寇鴻萍、梁廷鏘

發達心聲咪睇小

　　新正頭跑馬，當然要揀啲意頭馬嚟捧場，第二場「財運」就好啱心水，呢隻馬實力一啲都唔簡單，前仗初出跑田草1200米，只係輸短頭位跑第二，證明質素唔曳，今次增程跑1400米更啱發揮，排埋一檔起步簡直如虎添翼。另外，「發達心聲」呢個馬名，亦係好多馬迷心願，上場谷草一哩追入第四，狀態返咗嚟，轉跑沙田小心殺個措手不及。

任達華