雷勁論戰：得力助手路有專長

魑魅魍魉

　　今日年初三賀歲戰，告達理馬房共派七駒上陣，其中第六場四班1600米更雙龍出海，似乎志在必得。當中「得力助手」以往三戰同程取得冠亞季各一，擺明路有專長，今番再吼強項上陣，練者應有心在新春攞威，安國倫亦騎慣騎熟，要再下一城冇難度，值得作為重心看待。

金鑽龍華必拼

　　另外，梁定華馬房今日亦有多匹惡馬上陣，出爭第四場三班1400米的「金鑽龍華」季內長期保持良好狀態，上仗跑谷草1200米落敗，賽後都爾向廐主解釋，指此駒現時落腳已轉慢，應轉向中距離發展，所以建議梁定華今次替此駒報跑田草1400米。

　　不過，由於都爾停賽，今仗「金鑽龍華」改由黎海榮操刀，而在排位之後，騎者更親自到華廐睇帶並與廐主商討戰略，必有搏殺意圖。

　　其他華廐馬當中，尚有出爭第五場五班1400米的「風馳電掣」要留意，今次一早卜定韋達操刀，可見戰意鮮明，論質素在五班實在超級，可作馬膽。

　　同場對手方面，最有威脅是胡森馬房的「好小子」，連續兩戰力拼僅敗，但今次要排十四檔起步，對牠不無影響，作配為宜。

　　此外，文廐「嘻哈大少」亦是一匹質有進步之馬，居五班亦有多少便宜，今次特邀柏寶執韁，有心拼個明白。「幸運來」上仗在谷草亦見有上佳追勢，轉投苗廐後尚未交代，可兼顧。