楝悉先機：中環英雄賽績堅

魑魅魍魉

　　唔係阿棟危言聳聽，有時田草C+3欄賽果真係難捉，有多時爆埋啲無厘頭嘅馬出嚟，12月中嗰期99倍嘅「紅珊瑚」已經係經典例子。所以，但凡田草或谷草C+3欄賽事，我都慳住嚟玩，費時浪費子彈，要大注大注轟落去，梗係留番比較正常嘅場合。

　　第二場第四班1000米草地。「父子兵」上場跑到冇影，賽後翌晨驗到左後足不良於行，兼且背部疼痛，咁就解釋到點解跑到咁差。而上賽後唞咗3個禮拜先至復操，之後亦一度放慢工夫，如果一個閘都冇試過，阿棟一定耍手拎頭，好在隻馬有試大閘，仲一氣呵成返嚟，仲要個大閘係最近先試，安心好多。能與「甜將」串Q之馬，一旦有狀態，四班目空一切。

　　第三場第三班1400米草地。「中環英雄」上季尾曾勝「雄心威龍」，後駒今季已4場頭馬到手，前駒卻僅得兩Q，成就相差太遠了，究竟係大家進度唔同，定係其他原因，我都諗到頭都爆，但三班點計都筍！今場儲夠新鮮感跑番1400米，可能仲好衝。

好好彩夠分量

　　第九場第三班1200米泥地。「好好彩」一連兩場泥地1200米冇W有Q，對住「富貴金龍」都冇怯，叮噹馬頭返嚟，後駒之後上二班仍然跑得好，伸算前駒在三班負輕磅仲係好有分量。今仗排2檔起步，啱晒佢放頭跑法，大有機會一放到底。

點買法

　　話咗今期細細注，冇理由自打嘴巴，唔會建議大家買呢樣買嗰樣，三重彩、四連環統統唔好玩嘞，脆脆地買條獨贏2 x 3算嘞，當係睇吓跑馬，都要參與吓，至於邊兩隻，比較喜歡第三場「中環英雄」及第九場「好好彩」，希望過晒有10倍回報。

陳華棟　資深評馬人