楝悉先機：紅衣叻叻 勝在當打

猪拉多纳

　　落雨濕濕，跑馬地B欄賽事，危危乎之夜。檔位已經有偏差，仲要整多幾滴雨，會影響賽事模式，又會令到部分唔識跑慢地嘅實力馬失利，總之就愈諗愈得人驚。阿棟向來崇尚留得青山在之說，要大棍大棍同馬會搏命，冇理由揀今晚啦！不如慳番啲錢，明日元宵與太座豪番餐好過。

　　第五場第三班1200米。「紅衣叻叻」近期處於當打之境，除咗前仗跑完第日腳痛嗰場，對上幾場冇W有Q，隻馬有幾弗，賽績已經話晒畀我哋知。今仗殺到上三班，對手唔同，路程又唔同，變數唔係冇。但佢少負十幾磅，4歲仔亦會進步，夠唔夠同原班馬鬥，邊個知一定被比下去！仲要有埋2檔，只要貼到欄走順咗，地慢唔易追佢。

　　第七場第二班1800米。巫斯義今場有3駒揀，內裏係咪真係任佢揀，大家都唔知，但有一點我哋好清楚，一定唔使估估吓，就係3匹新勝馬之中，上場贏得最易就係「快人快語」。同埋正路咁諗，呢匹馬上年係想贏打吡，心頭實高，所以，交代咗，亦唔會攤凍先至食。再者，加程對佢嚟講，有好冇壞。

海力童加磅少

　　第八場第三班1650米。唔好話阿棟滑頭，雖然追多次「海力童」， 但大家不可不知，此駒之前贏完例冇兩劑。不過我睇隻馬上場贏得幾易，只加5分留在原班，實際係多負3磅，唔應該拖垮。加上，告達理潘頓少合作而成功率唔錯，決定追多次。

點買法

　　但凡天氣唔穩， 阿棟九成九會忍，但當睇跑馬，都要參與吓。今晚3匹重心馬，第五場「紅衣叻叻」係最好心水，因為計條件、形勢算係齊備。至於重心Q 場次都係揀埋同一場， 今期唔玩過關嘞！

資深評馬人　陳華棟