楝悉先機：軍事攻略唔驚天久

魑魅魍魉

　　阿棟講嘢，一就一、二就二，唔會此一時、彼一時，所以，上期勸大家唔好喺混亂場合搏命，今期所持態度一樣 ！ 原本A欄加上大賽，係賭實力熱門馬最佳時機，好衰唔衰，撞到有雨，場地一變慢，咩事都會發生，最有機會嘅，就梗係啲後上馬出現姍姍來遲鏡頭！

　　第三場四班1400米草地。「風雲武士」自從加咗鼻箍同面箍之後，成隻馬唔同晒，跑3場冇W有P，漸漸有成就，證明當初阿棟冇睇錯佢，只係當時未成氣候啫。而上場見佢直路衝刺一再受阻，一樣衝贏晒對手，級數係主因，事關隻馬衝到最後100米先至起勁，如果唔係贏級數，隨時追唔到，亦因此，引伸到今場加程至1400米，有好冇壞。

　　第九場一級賽1800米草地。「軍事攻略」上場遇到「天久」唔夠鬥，級數有距離？我又唔係咁覺得， 如果今場繼續跑1600米， 我一定唔駁嘴，但跑長200米，兩駒嘅實力將會拉到好近好近，如果今日場地慢，對「軍事攻略」亦有利，反先此其時！

何方神聖夠分量

　　第十場二班1600米草地。「何方神聖」二班跑3場，仍然未贏到，但冇1場輸得遠，總之能與「人人興旺」互有勝負，呢班唔會冇能力贏。而上場直路唔係畀「經典皇牌」喺外側頂住，遲遲至發力，可能衝得更勁。霍利時今仗用到愛將馬偉昌，一定搏老命爭分。

點買法

　　一有雨， 就心煩，度嚟度去又驚後追不利，一陣又怕心水馬唔識應付慢地， 總之， 揀嚟揀去唔會100% 有信心。重頭戲「軍事攻略」有權反先「天久」， 唔使等到打吡， 心水Q 都係揀呢場。

資深評馬人　陳華棟