借題發揮：姚本輝戰馬搏殺期 正白旗沙紙有貨交

魑魅魍魉

　　2月對姚本輝嚟講，係幾滿意嘅月份，先有「電光能源」贏場杜拜泥地賽，而入唔入選金莎軒係之後嘅事。而佢喺本地賽，亦順到不得了，對上3期，田草又好，谷草又好，又或是田泥，都係「孖孖」聲，其中喺兩期之前嘅谷草，嗰晚出5駒，仲全部上晒名，啲攻略勁到咁，的確係搏殺期。

　　事實上，由9月至今，2月係姚廐單月贏馬最多，話佢旺，話佢喺搏殺周期，其實冇乜所謂，總之，作為馬迷嘅你我，知道個馬房呢排有貨交就得，起碼擺錢落去，都會多啲信心。好過賭啲飄忽馬房，熱門又嫌熱，縮番條槓，冷門又捉佢唔到，賭馬賭到得啖怨氣！

　　望落姚廐今期兵力，出夠10件，唔係人咁品，阿Jack懶醒咁諗，如果馬房開始要回氣，出咁多匹馬把鬼？出嚟害人咩！所以，估計仍然有出擊意思。咁柏寶騎嗰對馬「善戰」和「正白旗」，一定要優先考慮，前駒上場田草喺末段受困仍有追勁，回到泥地，一定更強；後駒外地賽績準繩，初出跑短博分頭，熱完身，下仗可能熱辣辣，呢注預咗畀佢先。另外，「沙紙」跑1場之後即上名，呢隻PP 嚟得快， 肯加程，唔會等。

Jack