洪禮賢講馬：歡樂繽紛 走勢露光

港陌

　　第九場三班1400米。「威皇鷹」上次賽前有咳，結果大熱只得第三名，打叠贏唔到，究竟係咳嗽影響？前仗頭馬水準普通？沿路三叠望空蝕唔起？總會有1樣關事，亦可能全部都係熱倒嘅「兇手」。至於今場有啲嘢唔同咗，路程由1200米改至1400米，仲加埋頭罩。增程幫唔幫到手，其實好難講，但外地一出已跑此程，以及上線血統有晒長力，唔應該有問題。而加配件料會有助，因季內兩場所見，陣上比較難留，一再有鬥口、唔穩定舉止，如配件起到作用，早段留得順，拉士爆起上嚟一定勁啲。由上季初出唔好形勢幾乎有P，再到今季一出輕勝，能力值唔會係一般三班馬可比，如果上場敗因係健康問題，冇理由輸1場就對佢嘅實力有懷疑。總之，係龍係蛇，睇埋今場先下定論。

　　第十場一班1400米。「歡樂繽紛」上賽前對佢嘅狀態好有疑問，耐冇出係原因之一，而最主要則係試大閘完全冇料到，所以，往績幾勁都冇揀佢，不過，落場跑唔係差，尤其未受阻之前，其實喺內欄有得湧吓，希望經過1場熱身，進度能躍升。

　　事實上，剛仗直路先係與對手互碰，繼而跑得一百幾十米就塞車，但喺受阻前後，曾經有唔錯追勢，單講嗰兩段仔，的確比預期好好多。跑完1場會好幾多，唔易一口咬定，如果有番八九成水準，已有資格入三甲。