借題發揮：創新福星係精英 超群如意演出準 大細摩夾擊苗禮德

猪拉多纳

　　冇記錯嘅話， 過去7屆港澳盃，主隊幾鬼醒，只係得兩屆畀澳門馬贏到，「XXX禮物」及「爆料」。嚟到今屆又會點？講真，雖然主隊仍有部分高分馬，1400米好叻而又有近績嘅，其實唔係多，呢屆算係陣容比較差啲嘅一屆，會唔會畀外隊有機可乘，阿Jack覺得唔係冇可能。故此，唔係話唔爭自己人，但太熱的話，就要小心只係大香港主義作祟嘞！

　　上屆盟主「爆料」出自摩加利馬房，今屆佢派3駒嚟跑，食髓知味嗎？心雄想再贏？睇嚟就係嘞。當中以「創新福星」呢匹配售精英更不可不防， 如果畀呢匹馬入到三甲，證明鄰埠配售馬計劃成功，所以，細摩在公在私，好大機會以此駒作為主力。

　　而大哥（大摩）出兩駒，「飛闖」及「超群如意」前駒此程冇料，出場只係旨在參與，反而後駒磅位輕飄飄，一直以來演出準，1400米更未曾跌出三甲，呢隻係主力，好正常。

飛銀動力上仗水準高

　　摩氏兄弟捧唔捧到盃，最大阻力應係嚟自苗禮德馬房嘅「飛銀動力」，當然，一睇配搭真係腳軟，騎練少合作而成績唔好，仲要韋哥今季級際賽未好過，但此馬上場入Q水準好高，輸畀兩匹之後在G1不勝有位之馬，呢場G3，佢點會冇實力問鼎。

Jack