借題發揮：進軍黃金路程 威威多星開火 何澤堯谷戰有方

港陌

　　如果有入開馬場嘅朋友，又有喺沙圈企吓，唔難發覺到，方嘉柏成日對住何澤堯訓話，通常呢個情景都係喺賽後落馬時候出現。師父久唔久板起塊面，成隻五筒咁款，做徒弟固然肅然起敬，不苟言笑，雖然未至於被鬧到頭耷耷，但師父指手劃腳，動作多多就經常都係。

　　可能身為師父嘅方仔，為咗徒弟前途着想，唔嚴厲啲，驚佢枉費大好機會，始終叻極亦只係見習生，出道才不過第二季，點樣天資聰穎，如果冇個人喺身邊教育，上唔到位事小，誤入歧途搞到一身蟻先麻煩。所以，何澤堯應該慶幸自己有個好師父。

　　話唔定因為教導有「方」，亦可能師父有心栽培，睇過師徒二人合作紀錄，一直保持高上名率，尤其係快活谷1200米，二人合作馬跑入前四名比率，高逾60%。

　　今期佢哋有4匹合作馬，其中3匹係跑佢哋嘅黃金路程1200米，「威威多星」、「火燎腚」及「大進」，3駒之中，計近績前駒比較失色，但上場喺 1000米竟然喪追，怕且增程200米，唔會冇晒啲後勁啩？！至於後兩駒，1匹係新勝馬，另1匹係路程專材之中嘅專材，冇咩好擔心，最多係「火燎腚」11 檔啫，如果影響輕微，仍有得贏。 

Jack