高清睇跑馬：新領袖收復失地

猪拉多纳

　　「金鑾大殿」今季初出跑田草1200米，輸兩個身位不算太叻，但之後票數卻相當犀利，連續三戰成熱開跑，然而卻全部三甲不入，打後兩仗仍有飛，但表現亦失色。

　　上仗總場次427，「金鑾大殿」加交叉鼻箍上陣，立即來個大變身，於田草1600米殺入一席第三。該役牠排二檔起步，大半程貼欄跟在七、八位，入直路繼續走內檔衝刺，末段愈衝愈勁，僅以頸位不敵頭馬「快利多」跑第三，若非白德民有點心急，未入直路已經開始發力，相信已可贏馬。再睇頭馬「快利多」，接戰再出亦順利取得連捷，證明賽事水準甚高。今次「金鑾大殿」唞足一個月才上陣，似乎有心蓄銳一擊，用梁家俊減磅更加好跑，有力在此打開勝門。

戴眼罩威力強

　　另外，「新領袖」上季勝後一直冇表現，季初仲要次次大敗，徐雨石無可奈何，大前仗安排此駒重戴眼罩上陣，豈料效果顯著，末段追入一席第五。翌戰「新領袖」再配韋達跑1400米，重飛搏殺之下終於重響勝鼓，最吸引是牠在直路一度被困，遲望空下一樣後上贏馬，交出凌厲衝刺。

　　上仗總場次424，「新領袖」續爭1400米，出閘緩慢失了先機，韋達早段唯有出力推騎，之後馬兒走來有點搶口，被迫緊韁扣實減速，但因此再次落後，去到彎位中段騎者再推騎，車前倒後用力不少，最終仍能追入一席季軍，表現已可收貨。今仗此駒再爭1400米，續交韋達操刀，同場對手非強，應可收復失地。

Sam