高清睇跑馬：得力助手收復失地

魑魅魍魉

　　「無敵鷹王」季初已見加眼罩試閘， 但頭幾仗並未有加配備出賽，結果表現一般。文家良痛定思痛後，大前仗終安排此駒加罩上陣，結果即在谷草一哩上名。

　　接戰「無敵鷹王」再爭谷草一哩，進佔內欄位置之後，卻未見白德民推騎，反而一直居於後列競跑，該戰步速偏慢，最終被中段踩油的「駕世鞍」走甩，此駒只追得一席第四。

無敵鷹王後勁強

　　上仗總場次418，「無敵鷹王」改配柏寶再爭同程，排11檔起步，唯有再次採用留前鬥後戰略，轉彎時走出外叠蝕位，但末段仍能交上極強的加速力，造出22.48秒的快時間追入亞軍，後勁非一般五班馬可比。今次文家良安排「無敵鷹王」再爭一哩，排二檔起步形勢反客為主，應是時候贏回一仗。

　　「得力助手」大前仗出爭田草1600米，以輕鬆姿態挫「黃金褭蹄」開齋，後駒其後已征服三班賽，反映賽事水準極高。翌仗「得力助手」再爭贏馬路程，自然受到追捧，豈料成熱之下卻跑到冇影，大告賽後解畫亦未能提供理由。

　　上仗總場次437，告達理決定安排「得力助手」改攻谷草一哩，陣上更改用快放戰略，雖然牠排在內檔起步，但早段仍要走二、三叠，直至對面直路先可貼欄領放，但到中段又被「天下寶」拍住鬥燒，結果末段又被迫走出二、三叠蝕位，最終僅以頭位不敵頭馬「駕寶」跑第二，表現已算出色。今番「得力助手」再戰谷草一哩，有過上仗經驗之後，今仗必有更佳演出，力足補中。

Sam