洪禮賢講馬：卡達聖 唔怕轉程

魑魅魍魉

　　第六場三班1200米。「海之宏」季內幾乎跑親都輸，仲係輸到冇前冇後嗰種，但上場居然喺同程入Q，表現出從前應有實力，係咪偶一為之？唔敢肯定，如果係養番好嘅先兆，喺三班真係惡到出汁。要知道，佢入Q當晚嘅谷草A欄，大圍計數利貼欄，尤其係短途，佢可以沿路二叠蝕，直路仍有第二段力再衝，大有全盛期嘅「海之宏」影子。

　　昨朝最後試跑，見佢步出內圈即刻一支箭咁標，快走嗰段唔係得三幾步，差唔多走到去第二座電算機（昨日係倒圈試），之後先至勒得住踱番慢。而踱到第二圈，仍見佢好火有力，神氣不減，睇嚟狀態不但喼到，仲有再上之感。呢場排2檔起步，唔難放返。

　　第七場二班1800米。「卡達聖」有啲似上季「魔法幻影」，跑過田草，唔係未近過，但就贏唔到，可能進度未有預期咁大，試吓過嚟谷草，恃住有啲質地「蝦」班細場常客，當然，谷草性能得唔得？隻隻馬唔同，就算同一部署，效果都可能唔一樣，仲要係「卡達聖」冇谷閘紀錄，唔係冇風險，但查佢喺外地曾經跑過場仔，料完全唔適應嘅可能性唔大。

　　計佢之前兩場表現，92分起步唔嫌高，上場唔係直路窒一窒，要閃番入中檔上，「勁高手」可能連Q都保唔住；加程至1800米，點都比中程迎合性能，如果唔係過分高估，今場贏面幾大。

馬會賽馬節目主持　洪禮賢