楝悉先機：一定爆升班冇有怕

猪拉多纳

　　谷草C 欄C+3彎賽事．有偏差係好事，起碼有得跟，如果冇盤路去捉，盲摸摸，反而仲衰！睇過近三兩期C欄賽果，外檔馬幾掂，後上馬又唔蝕，但最緊要今晚冇雨，如果唔係，驚會亂咗路。

　　第三場三班1000米。「一定爆」上場算佢犀利，第1次走過嚟快活谷，雖然話係四班賽，都贏到超惡咁款！「永同至尊」和「盈驥」如果跑出水準，喺四班唔係冇料到，上場末段居然黐唔到埋去，「一定爆」段速有幾快，可想而知。上到三班跑，對手唔同咗，但3歲仔仲跑緊磅，只負122磅，隨時識飛，仍然冇有怕。

　　第六場三班1200米。「勁飛駿」初出有啲飛數，當時我唔係咁睇好，因為PP初出，未必可跑足十成，結果守靚位之下，末段勁度唔係幾貫注，只係跑番個第四名。由於已熱身，預期今場會唔同，亦因轉了場地，仲邊度有「旺當家」、「爪皇盛水」之類惡馬，三甲有望。

伽羅破釜沉舟

　　第七場二班1800米。鍾意「伽羅」真濕滯，鬼咩，呢個馬房冇發市好耐，兩個月白果水， 但隻馬明明係好，冇理由夾硬要轉投同場其他馬！而「伽羅」今場終於向較長路程進軍，絕對係好事，因近仗中程賽事，一而再見佢末段唔係好鬥得，未必係實力止於此，或是路短所致。呢場寧願升班跑呢程，有破釜沉舟之心。

點買法

　　今期重心W 放在第三場「一定爆」身上，上場真係太輕鬆， 升班都唔怕，但諗唔到孖邊隻好，所以，都係獨頭W 算嘞。心水連贏就揀第七場，揸隻半冷膽「伽羅」，用嚟買Q 及PQ 點都有得分吓！

資深評馬人　陳華棟