洪禮賢講馬：正確方向運用數據 增加投X勝算

魑魅魍魉

　　透過賽事累積嘅數據，從而用喺投X上，贏面會提高幾多？各人有唔同嘅勝算，如果唔係規律地運用注碼、冇用啱數據帶來嘅方向、略帶感情用事等等，唔慌會好得去邊。當然，數據總有爆煲之日，唔通跑足一季，白德民都唔會贏場谷草1650米咩（暫時成績為2亞5季24負）！但要知道，累積出一定基數之後，點解唔去避吓。如果開季後（9至12月），察覺到白德民長期未贏過谷草一哩，1月開始，佢12匹該程坐騎，一律唔買W，可能慳番唔少（有5駒仲係7倍以下熱門，結果冇1隻入到三甲）。

　　又例如，小將何澤堯，今季谷草大熱坐騎，未試過跌出前四名（3冠4亞5季4殿），一睇之下，可能會講：「唓，大熱門贏得3隻，長跟輸甩褲啦，知嚟都冇乜作用！」然而，換了另一角度去睇，可以好好運用佢嘅大熱坐騎，用嚟買三重彩、單T、四連環等彩池。嘩，隻隻預咗實入到嚟咁滯，做四連環馬膽，真係定過抬炸彈！

　　日前做直播節目，都有帶出葉廐新勝馬堅得，簡直係準到冇朋友！季內12匹谷草新勝馬再出（翌仗跑谷草），取得2冠4亞4季，比率去到 83.3%。雖然打叠W次數有限，最緊要知道佢嘅馬，贏完翌仗嘅穩定性有幾強，投X時點會冇幫助。坦白講，個人唔係數據男，不過，搵到而又覺得啱使，眾樂樂嘛，冇害啫。

馬會賽馬節目主持　洪禮賢