高清睇跑馬:新希望穩食尾胡

港陌

　　「旺當家」今季於總場次152初出跑田草1200米，柏寶未有打鞭下輕取「好辣椒」四個多馬位，賽後加13分兼升上三班作賽，但排十三檔全程望空下僅得季軍；接戰加綁脷帶諗住補中，點知扭計漏閘陪跑，好彩競賽小組當佢冇跑，投X者獲回水。上仗出戰總場次443田草1200米，除環形口銜鐵後即重開勝門，而且最後百五米柏寶先推騎，只打一鞭並跑出1分09秒65，比當日二班的「富貴金龍」只慢一線而已，這次對手似較上仗更弱，篤定連捷。

　　另外，「新希望」轉戰1600米後表現出色，四戰共得兩冠一亞一季；近兩戰未能添食，全因對手強或本身發揮差有關；前仗總場次430田草1600米，「新希望」排四檔，奇怪韋達選擇抽到實，兼畀排外檔的「勁高手」切入失先機，結果步速不快下姍姍來遲得第三。

　　上仗總場次485田草同程，縱排十一檔但韋達於出閘後即極速切入二叠，可以話一步冇跑錯，只是頭馬「包裝選擇」太勁，最終單打獨鬥下飲恨得第二，但「新希望」跑出1分35秒05已是其同程最快時間，足證愈跑愈進步，有力替蘇廐食尾胡。

Sam