馬主論戰

魑魅魍魉

和牛連捷冇難度

　　剛啱蔡約翰只係派出一匹「華倫天奴」上陣，結果一擊即中，我睇好佢今戰繼續有馬贏。最啱心水係第六場「和牛」，上場增程跑1400米即開齋，中距離馬終於現真身，今次再跑贏馬路程，睇唔到有任何阻力。另外推介第五場姚廐「勁力」，響谷草熱身一場後，上場轉場跑1400米，排外檔亦殺入第三，質素唔簡單，今次改排二檔起步，應該可以補中。

張敬山

皇龍戰駒食尾胡

　　楊明綸剛戰僅憑「高風格」贏一W已封王，似乎行緊運，不妨再吼佢啲坐騎。最啱心水係第九場「開心駕到」，前仗響田草1200米爆冷入位，證明有質素，上場跑第五表現都唔曳，今次增程跑1400米必更加啱發揮，出頭在望。另外鍾意尾場「皇龍戰駒」，近兩場對住「勁飛寶」、「傾力之城」都輸唔遠，反映有分響手，加上跑法夠主動，話唔定可食尾胡。

任達華

多益善換人搏殺

　　吳定強剛啱憑「精靈勇駿」同「及時雨」起孖，暫時季內贏得八場頭馬，仍然未夠數，相信攻勢陸續有來。推介第四場「暖在心頭」，上季尾響四班都有得鍊吓，戰鬥力唔講得笑，上場響田草1600米交出復甦走勢入Q，今次再跑此程有望補中。另外鍾意第八場「多益善」，在港三戰全獲獎金，演出尚算準繩，韋達唔騎換上柏寶，戰鬥力隨時更強，咪睇小。

寇鴻萍、梁廷鏘