棟悉先機：駕世仔 二叠夠贏

魑魅魍魉

　　睇天氣報告，天文台話今日會有雨，同埋幾陣狂風雷暴，如果跑緊馬落雨，就真係弊弊都冇咁弊！谷草B欄C彎跑道已經有偏差，加上場地狀況唔正常，賽果將更加難捉摸。總之，如果唔啱心水，呢期賽事千祈唔好夾硬賭。

　　第六場四班1650米。「駕世仔」一用柏寶即刻得手，唔係話上手嘅何澤堯唔好，佢功夫仔都唔錯，但呢匹的確係師傅馬，仲要係硬功先收服到佢，事實上，剛仗柏寶入到直路，係咁用右手狂揪，但隻馬仍然唔係好規矩，不過，兩頭「片」比前冇咁明顯就真嘅，反映阿柏食得住。今仗冇加磅，對手唔係惡，12檔際遇難講，如不是太差，楔到二叠，應該都夠贏。

　　第七場三班1200米。「紅旗勇將」外地贏1場，即運嚟香港，實力如何？進步有幾多？根本冇得預料，不過，據手足所講，佢哋睇隻馬幾有前景，二班應該都夠贏，所以，插三班評67分，其實係着數。既然之前大閘有頭有尾，只要唔係得個外殼，初出已經有機會。

包裝選擇跳班再捷

　　第八場一班2200米。「包裝選擇」上場真係勁，以極快時間1.34.99贏田草1600米，而臨尾力抗「新希望」的鏡頭，甚為悅目。雖然今場跳班跑，仲要轉到谷草，賽事環境及水平完全唔同晒，可能影都冇唔奇！但以佢嘅跑法，應付到嘅成數幾高。由於只負118磅，有輕磅優勢，或者大大拉近實力差距，不無再捷資格。

點買法

　　今期賽事，如果冇受天雨影響，可買W過關，「駕世仔」串射「紅旗勇將」，乘埋唔錯㗎！重心Q則放在第七場，幾匹路馬可控制大局，９、５、７、２是也，買三重彩就兼顧埋３、４一對。

資深評馬人　陳華棟