洪禮賢講馬：錢程萬里康駿善風天鷹 心路金剛驃劍鋒浪漫添馬

魑魅魍魉

　　谷草C欄檔位偏差係冇B欄咁嚴重，但都係「早走早着」，留得太後要喺直路反先並唔容易。選馬之時，都係側重跑法係前中置嗰類好啲。

重心場次　第3場　第三班（85-60分）1650米

　　「鵬力洋洋」操住嚟等今次賽程，由於用小梁，喺三班唔使孭頂磅，始終着數，以佢今季優越賽績，要喺今場攞個P唔難。

　　「火箭動力」降班半嚟跑，負重依然具十足分量。「威利嘉」隔得耐復出唔係跑得唔好，嘗試加程至一哩，或試出彩虹。「寶貝王子」實力及狀態見晒，爭吓二二三三。「心中有程」處身今場，又以慢步速帶到嘅機會唔大。「好得意」太準，初跑谷草亦唔敢批死。

第1場　第四班（60-40分）1000米

　　「好妙星」2檔有天然優勢，又因今場太多對手早段會走，啱晒佢跑法。「友情友義」喺內側3駒冇隻快，要搶欄放應可做到，升班因太輕磅，未必冇得鬥。「精靈勇駿」贏開勢銳。

　　「祥禎」12檔未必太大影響，預期今場快步速，佢會有得追。「西域雄心」轉倉第2仗跑得太差，輸到唔似真。「都靈一號」上賽略轉留後跑法，出來效果不錯，可惜排大外檔。「大地王者」大幅縮程而調息日子太短。

第2場　第五班（40-0分）1000米

　　「不老精英」終於落班，賽前唔再亂報名或亂跑，做到夠等今場，仲要試夠兩個1000米大閘先跑，成擔心機擺晒喺度。「馬中神駒」跑啱晒一樣贏唔到，能力已盡，好在有番足夠時間回氣，希望喼到。

　　「揀得準」此程會比1200米放得寫意。「先知先覺」排喺前駒埋便，本身速度又唔會比下去，早段如放得順，或可帶到。「大情大勝」如有番之前大閘段段有速度，1檔嘅佢，形勢比前兩駒更好。

第4場　第四班（60-40分）2200米

　　「錢程萬里」上季曾有類似大幅加程安排（一哩大敗後，轉此程贏馬），有理由相信落班即有郁手意思，而計馬喺四班點都係超。「康駿」係得個準字，四班有冇得揮，好難一口咬定，睇在路程及近績份上，可拖。

　　「高明威威」少谷草經驗，大長途卻合適，邊線馬。「天鷹」評42分水平，根據往績係好有危險性。「善風」久休第3仗跑番大長途，會比一哩更啱衝。「鐳射槍」長期會喺拉士湧一段，惜成日得個影。

第5場　第四班（60-40分）1650米

　　「心路」及「金剛驃」，上賽同程分獲季殿軍，前駒衰在留得太後，以及直路要轉位衝；後駒則過於主動累事，如果執番正晒跑法，有權一Q返。

　　「寶德」及「劍鋒」，東廐兩駒，前駒入P一役唔算有指標性；後駒一再放得唔慢而常入圍，更具睇頭。「浪漫添馬」近兩仗表現差得遠，全因檔位及出閘反應影響，今仗5檔，條件尚可。「橫亨」已失望多時。「馬皇帝」加程會比短途合適，但能力所限。

第6場　第三班（80-60分）1650米

　　「漂亮第一」係擔心騎練今季合作未好過，如果以剛賽1800米咁放法而跑得咁近，縮落一哩有埋2檔，沿路守到好位，直路就好世界。「世界波」馬老唔襟搏，唞完復出係好，問題係重磅及外檔，令呢匹本來已冇十足贏面之馬再打折。

　　「國中之星」冇馬走，如果畀佢帶順，此程也可應付。「好心星」上場發揮「算罷啦」，刻意搶前唔合馬性，用番前仗入Q水準計能力才實際。「四季」上場究竟係初跑谷草，能力未露晒出嚟？定係跑啱晒而冇P？今場用到主帥，會搵到答案。

第7場　第三班（80-60分）1200米

　　「佳同」面對慢步速，最後兩段可愈跑愈快贏同程，上場顯示到縮程及加罩威力，加7分濕濕碎。「海之宏」及「輕輕鬆鬆」，排晒中外檔，出閘如不快，可能頂在外叠，中途已收工。

　　「御將軍」上場係咪因檔位而轉跑法其實唔係重點，着眼處係轉直路彎之後騎者嘅攞位略猶豫下，唔能夠發揮到十足後勁，希望換人效果唔同。「萬事綵」上三班後兩戰兩敗（前仗有痰，上場直路被撞及受壓），但未覺完全絕望。「海王子」在此程排4檔或以內，真係好少失拖。

第8場　第二班（100-80分）1200米

　　「文武維揚」跑馬地百萬挑戰盃盟主，回夠氣復出，賽前有大閘，課期亦妥當，冇乜挑剔。「勁勇士」及「此時此刻」，一對前置馬，位好及主動，雖遇強手，或受惠跑法。

　　「明燈」揀開，已指出前仗係亂跑，上場做番啱留放即入Q，證明現時幾有水準。「開心動力」二班此程有靚檔，唔敢批死。

馬會賽馬節目主持　洪禮賢