佳同勝途再達陣

魑魅魍魉

「佳同」今季起在港上陣，五戰田草得個近字，跑千四毫不突出，剛戰移師谷戰縮程千二卻試出彩虹，成功打開勝利之門，蹄下敗將「威威多星」、「輕輕鬆鬆」再出紛紛補中，水準之高可見，難怪柏寶攬實唔放手，拍住葉楚航齊齊進攻今晚香港欖球總會盃，力圖再率先達陣。
       
佳同上仗初跑谷草千二米，即在柏寶胯下開齋。

葉楚航：我之前一直安排「佳同」專攻田草千四米，但馬兒似乎仍未養成氣量，往往只能跑得接近，故此剛戰刻意縮程角逐谷草千二米，末段衝刺果然更貫注，結果順利打開在港勝門，表現出色。另外，「佳同」上仗加眼罩跑來亦比前集中，而換上硬橋硬馬的柏寶，有助此駒激發潛能，既然復課後狀態保持勇銳，今次再攻此程，續由柏寶執韁，抽六檔起步亦算理想，應有權再下一城。
       
換牌仔輕輕鬆鬆

呂健威：「輕輕鬆鬆」連番近而未逞，剛戰終於在谷草千二米開胡，令我分外高興。今次刻意再報贏馬路程，可惜黎海榮正停賽，惟改用楊明綸減五磅，卻有助消化加分壓力，不難再闖入前列。
       
御將軍檔位內移

白德民：「御將軍」在港兩捷均在四班取得，目前跑三班賽難言優勢。勝在五歲馬近況良好，排位朝快試兩段走勢輕鬆，剛戰受制於十檔仍後上追近，今次再負輕磅兼轉抽四檔，可望爭取更佳名次。
       
萬事綵千二啱啲

蔡明紹：「萬事綵」近兩戰升上三班非無招架之力，惟前仗谷草一千未夠前速領放，上回千二米則跑得較輕鬆，現階段此程更合發揮。難得今仗抽三檔好位，只要讓牠貼欄順走，力足殺入一席。