高清睇跑馬:薄荷糖衝刺如箭

猪拉多纳

　　第七場四班1600米，「薄荷糖」至今三戰全部闖入前四名，名次卻一次比一次退步，看似水準不高，但睇番次次出戰唔同路程，依然跑近相當厲害。初出總場次460田草1000米，後備補出備戰平淡，大半程遙遙落後，奇怪鞍上人遲遲唔發力之下，極度劣勢一樣殺入Q腳；接戰總場次497改攻1200米，何澤堯唔再留前鬥後，馬匹亦因此未及適應，轉彎時持續外閃，搞到半程望空，去到一百米澤仔又一度甩韁，以致僅得季軍；上仗總場次536再增程跑1400米，易配馬偉昌一心留後，跑法冇錯末段衝刺如箭，可惜入直路連番受阻，拉回中檔衝又前無去路，直至拉士百五米「勁力」出頭先至有位，當然為時已晚後上不及，今戰再爭同程應可收復失地。

清風駒部署明智

　　第六場四班1400米，「清風駒」上季五戰全部係熱門，拉士兩戰更成為大熱，一仗初跑谷中一哩，一次首戰田草1400米，幕後自視之高可見一斑，今季去到三月九日才上前線，睇番操練紀錄，早於上年八月開操，之後亦缺課不多，遲遲上陣應跟十月曾有膿痰及決心搞好弊端有關，可惜總場次451排十檔起步，全程外叠望空無功而還，接戰總場次478改攻田草1200米，一檔起步卻前速一般，加上入直路未能立即望空，結果後上不及僅得季軍，上仗總場次 528回師谷草1200米又做三哥，此戰輸在爆炸力唔夠，今次回田草即增程二百部署實屬明智，跑法均速之輩，今戰快馬不多亦佔有優勢，決心贏馬打破悶局，半冷馬膽。

Sam