借題發揮：告東尼方嘉柏爭住撐 巫斯義旅途美麗

猪拉多纳

　　由於今日跑冠軍一哩賽，有部分世界級騎師過嚟跑，柏兆雷、蘇銘倫、岳禮華等等，部分騎師只得錦標賽1場有坐騎，係咪佢哋想專注1場賽事，抑或冇去坐騎？在下不得而知，但有兩位嘅坐騎數目明顯多，此乃鄧迪及巫斯義，前者有5匹馬，後者更達7駒之多。

　　坐騎多唔代表頭馬希望多，呢點連3歲細路都知，鄧迪那批坐騎，正正畀到咁嘅感覺阿Jack，莫講話有贏面，位置都唔知跑唔跑到，似係畀面性質居多。反觀阿巫有告東尼及方嘉柏撐住，應該唔會白果收場，估計頭馬希望會喺較後場次幾駒身上。

　　席上揀珍，「美的人生」、「旺國手」及「締造美麗」最合心水，前駒連前四名都未入過，但近仗一再有飛，冇「風」吹邊會有咁嘅賠率，而呢場繼續有墊底飛，睇佢之前在三班跑得咁近，如果呢場唔係又有痰，四班點會冇得跑。而「旺國手」，原來阿巫咁耐未騎過，以佢同方仔咁好交情，呢匹舊馬一直冇畀佢跑過，的確幾奇，忽然有關照，好似係有意思去搏。「締造美麗」遠征失敗冇辦法，路程唔係首本，返番香港，回跑1600米，即刻唔同人咁品啦！之前連贏3場 G1，幾勁唔使我多講嘞。

Jack