洪禮賢講馬：喜惑洪福齊來歐洲動力步步闖 勁贏晒自由萬歲快達小子清風駒

猪拉多纳

　　今日係冠軍一哩大賽日，兩大巨頭騎師出馬多，但唔係多W格。馬房方面，又係三大倉口揸晒旗，其中以東廐實力最強，似有數胡之勢。

重心場次　第10場　第三班（80-60分）1400米

　　「魔幻大師」初升三班即斷纜，班次阻力嗎？未必係事實之全部，因賽前曾兩度退出，操練進程也曾影響過，上場去到最後50米才力弱，其實唔係差，今次以更佳水準再跑，有冇睇得佢太高，今場就知。

　　「天瞳」上場由出閘開始，演繹已經要彈，而未轉直路彎嗰段，更加大錯特錯，咁都只輸兩乘幾，證明佢又有番分利，既然轉倉有做嘢嚟跑，要捧。

　　「豐衣足食」近仗係得心律不正嗰場冇P，演出咁有交帶，正路腳。「羅馬奔騰」近兩個幾月操練得宜，進展唔錯。「風雲武士」上班負輕磅，如果排檔好少少，應該要揀。「八逢九紫」剛仗直路唔只1次塞車，換番杜利萊，由熱變冷，仲啱博。

第1場　新馬　1000米

　　「良驥」曾勝1000米大閘，根據會多啲，雖然試跑仍覺出腳過高，但由於有多啲氣量證明，落場跑未必會有大差異。「熊英雄」兩勝大閘顯示到佢有幾強鬥心，如果睇前景，佢或會比前駒秀麗。

　　「永旺家」只係操咗個幾月，以進度嚟講，真係嚟得幾快。「幸運金龍」及「幸運至尊」，賽前整套準備，後駒較理想。

第2場　第五班（40-15分）1800米

　　「暖在心頭」和「綠駿群英」，係同場之中，最銳一對馬，講評分優勢的話，前駒略秤先。

　　「盈嘉飛駒」上場跑第三被加1分，係當日唯一季軍加分馬，具指引性。「幻想家」剛勝唔算係賺晒形勢，按理加程而換小將，仍有機會再W。

　　「神箭金剛」雖然上場直路曾受阻，但見之後有空位卻衝得唔勁。

第3場　第四班（60-40分）1000米

　　「鷹之團」近兩仗遇到「星運俊爵」及「勁闖駒」都冇說話好講，因該兩駒唔係手上有兩W，就係上三班仍有P，佢以短距離見負，已覺本事，四班實超。

　　「新蝦王」未識留力，嘗試轉到直路賽，可能搵到出路。「龍船快」始終係今場少數曾上名嘅3歲仔，贏了經驗。「麗晶之星」係擔心馬房冇兩劑。「大將軍」上場去到最後一段已力弱，現階段跑短200米或更宜。

第4場　第三班（80-60分）1200米

　　「喜惑」試過輸少少，又曾與超級馬串Q，佢喺三班亦只係過客。而睇佢上場去到直路中段一度慢腳咗，係路程性能問題？定係當時唔集中？總之，呢場加眼罩應會幫到。

　　「洪福齊來」贏兩W後隔番一排，但操住嚟等賽程，有晒鋪排爭三捷。「步步闖」上場輸直路受困，勿過早放棄。「歐洲動力」假假哋季內已兩W，秤能力唔可能睇小。餘駒之中，以「多歡騰」稍有跟進價值。

第5場　第四班（60-40分）1200米

　　「快樂無窮」係咪短途材料，其實幾懷疑，不過，早於數仗前已跟進，卻於縮程才跑得好，或許目前未夠氣，肯繼續跑此程，有番上場水準，已夠入圍。

　　「有莊有閑」分利，近數月準備正常過正常，小心。「真慷慨」試閘永遠側埋一邊身，但又唔係唔受騎，亦算幾鬥得。「多多昇」處身水準普通場合，弱項也唔敢睇小。

第6場　第四班（60-40分）1400米

　　「勁贏晒」上場跑法係落後咗啲，但以當日跑道模式，亦相當失利，跑輸與實力冇太大關係，總之，前仗入P水準勁，呢場係怕早段唔快，不利佢後追。「自由萬歲」前仗跑第三名，擊敗過「松林之星」等駒，唔係嘢小。

　　「快達小子」新勝、「清風駒」近績準，可一併揀埋。「好友星威」上場輸人。「美的人生」今場步速未必快，其實最啱發揮。

第7場　第四班（60-40分）1600米

　　「薄荷糖」錯在直路搵唔啱對手嚟跟，搞到上場直路衝程一再拖慢，惟末段撲上嚟個勢好勁，希望跑長200米一樣咁衝得。「財源來」上場已有貼，冇理由露光後唔揀。

　　「超勁精神」跑至1600米，冇可能會比1400米失色。「金鑛龍華」近兩仗再冇見佢難穩定，陣上情緒已乖晒，而上場最後300米塞車後仍有追勢，係驚14檔唔知點演繹！？「高分貝」冇分但勇、「雪米糍」漸熟，邊線腳。

第8場　第三班（80-60分）2000米

　　「歡欣滿載」及「佳景良駒」，近績出色，長途有晒證明，必揀。「危險英駿」連跑兩場中短途都唔用眼罩，卻1場比1場有走勢，收到以實戰去帶起狀態的效果，今場終於加程及加配件，到位。

　　「旺國手」卡士夠、「俊威威」弗極，可納入考慮。「印度光輝」如遇慢步速，對發揮好有影響。

第9場　一級賽（3歲及以上）1600米

　　「天久」唞番夠本，又唔使再跑唔合適路程，可望交得出贏經典一哩嘅級數。

　　「締造美麗」遠征後如沒有後遺症，以佢嘅能力，三甲會有。

　　「軍事攻略」能與「天久」在同程埋Q，已證明級數。「庭園華座」一哩錦標入Q表現出末段有幾爆得、「百威勝」最有分量，一對馬可拖。

第11場　第二班（100-80分）1400米

　　「續領風騷」初出即入Q，快時間之下輸畀「傾力之城」，盡顯能力。「蓬萊仙子」及「家樂飛」有賽績支持，正路配腳。

　　「至勇飛龍」唔係驚外檔又「外遊」，冷門可敲。「火箭動力」喺二班跑，未必夠鬥。「陽明深心」上場之失希望是偶一為之。

馬會賽馬節目主持　洪禮賢