洪禮賢講馬：韋達遲醒覺 搏輸佳景良駒

港陌

　　從來都唔會羨慕落飛黨嘅輝煌戰績、超強眼光，一來，人地輸嘅時候，唔會企出嚟話畀我地知。二來，大家對每1場賽事都係計數之嘛，唯一有出入、高低，可能係視野層面上，又或是注碼大小和分布，同埋策略問題。

　　喺日前賽事嘅第8場三班2000米，落飛黨又1場一戰功成，5號WP中到反，5搭8呢瓣Q更加中到瀉晒。「神州八號」嘅獨贏，的確有秒殺嘅 feel，喺短時間之內，大眾都未清楚發生緊咩事，賠率急插至唔夠5倍開跑，至於Q位仲誇！當時唔少連贏位都有燈着，但在嗰場那36瓣連贏位之中，零零舍舍得5搭8Q係啡色格，好明顯個別人等，轟呢瓣Q特別踴躍，而最後有46倍Q，回報真係唔錯。

　　講開呢場賽事，大熱門「佳景良駒」嘅演繹，的確有挑剔地方，但我們着眼點並唔係喺趨近直路彎，韋達有冇選擇收慢（賽後報告佢話驚塞車，寧願取外叠）。要深思反而係佢喺對面直路尾，至到彎心嗰段，點解意識唔到段速唔快，何不採取略為主動嘅對策。差唔多轉完直路彎，喺佢身邊大部分馬嘅騎師相繼發緊力，佢先至醒覺，當時至去全速推進，其實已經好遲。「佳景良駒」最尾保得住第三名，都唔知使唔使多謝佢好嘞！？

馬會賽馬節目主持　洪禮賢