棟悉先機：大衛金剛機會難逢

魑魅魍魉

　　阿棟經常掛喺口唇邊，但凡田草B欄、C欄或C+3欄等等，通常有啲偏差，嚴重程度未有快活谷咁緊要，肯定就冇A欄咁平衡，呢點冇得好拗，所以，今日其中7場C欄，唔係叫大家唔好賭，但該駒幾鍾意都好，落注宜縮一縮，哪怕冇柴燒嘛！

　　第四場五班1600米草地。「大衛金剛」今季跑就跑得多，9場嘞，卻依然守緊齋，係咪練馬師功力問題，梗係唔關事！主因係匹馬唔鬥得，死步頭，末段只係步步尺七之流，而性能又比較窄，要跑到近乎完美，再加上形勢，先至有機會贏。今場應該等到類似有利形勢，強手又相繼走晒，撞啱C欄利擺喺前嘅馬，估計今場係千載難逢場合。

　　第八場三班1000米草地。「鷹之團」唔係曾經傷過，操練受到影響，莫講話遲至上場4月尾先贏，以佢嘅實力，應該早已連贏連升，喺二班跑緊啦 ！ 目前進度納番入正軌，上三班邊會擔心，淨係睇佢上場取勝姿態，好似大人同細路仔玩咁，而3歲仔年紀仍然輕，負磅減少，有直接幫助，要再取1W，唔認為會受到考驗。

喜威寶泥戰演出準

　　第十場一班1650米泥地。「喜威寶」唔好似上季咁安排出爭大長途，反而大幅縮程轉戰泥地一哩，方仔如意算盤唔知打唔打得響，但睇佢今季跑親泥地冇1場輸得遠，大前仗仲只係輸少少返嚟，睇落呢場唔係冇得「偷」。如果今場步速唔快，畀佢慢慢帶，有權爆！

點買法

　　C欄我就點都勒實荷包小注怡情就算，WP捧第四場「大衛金剛」，但由於仍是處女馬，當然唔好大額捧場。至於重心Q揀第八場，熱就走唔甩，希望有得睇吓馬仔，又有得中吓，收番啲咪算數囉！

資深評馬人　陳華棟