洪禮賢講馬：薄荷糖大地王者真奇寶信賴 大把在手精彩生輝聖迪達太陽昇

魑魅魍魉

　　今期賽事7草4泥，草地在C欄上演，根據對上1期同一賽道模式，唔係後勁特別強之流，要喺直路大幅提升名次，其實唔係易。

重心場次　第11場　第三班（80-60分）1600米草地

　　「雨電風雷」計季內同程跑得好嘅賽績，贏得季內已3W「較量」，佢邊有可能目前得1場頭馬在手。自上場有痰後，順勢隔番一排，期間操練妥善，估計咁樣安排，隻馬仲「受」。

　　「新希望」及「逸逸友福」，剛仗一Q返，彼此可鬥到甩開後列對手，以此姿態，負中磅喺三班，依然上風。

　　「風雲武士」四升三班即贏，唔見得係受惠慢步速（沿路二叠望空置前），雖說初跑此程有變數，近績卻要尊重。「火熱動感」上場末段係有受阻，嚴格嚟講，拉士略見鬆懈，呢次換人及轉場，小心。「財運」及「駕世仔」，要進度翻一番先至有機會喺今場抬頭。

第1場　新馬　1000米草地

　　「熊英雄」初出喺中段已經拉唔住，之後愈跑愈快，贏到甩晒，加7磅邊有問題。

　　「同一理想」步幅幾大，試閘仍未規矩，不過，進度唔係特別差，同父馬初出成績亦信得過。「幸運金龍」首戰漏閘，但見拉士好受騎，此類馬省過1場隨時有大幅改變。

第2場　第五班（40-10分）1200米泥地

　　「京城孖寶」四班泥地係有得爭之流，基本上，喺五班要贏易過借火，今賽前特登唞番一輪，有晒鋪排。「駿馬飛騰」大前仗四班此程係咪黐欄賺晒返，其實唔重要，因為今場預咗又會一樣，唔同係班次降了。

　　「瀟洒良駒」最近大閘冇眼罩，末段係有啲「立」，總算迫住仍肯追，初跑泥地，未可批死。「揀得準」排好位，如交番輸畀「金巴利來」水準，有威脅。「好好運」縮程會好，因上場一哩中段難安穩。「好願景」擔心外檔影響。

第3場　第四班（60-40分）1000米草地

　　「樂韻悠揚」及「海豚」，剛賽此程幾乎同到，論全程走勢，後駒較討好。

　　「翔龍」初出所負距離唔算多，惟末段貼住欄都唔係湧得幾多，希望轉直路賽會好。「首飾達寶」比較兩大閘表現，5月頭試嗰次，聽話咗唔少，以操練日子唔係多咁計，進度算好。「愛蓮武士」擺前走大敗，但要留意上場早兩段造咩時間（比同日三班快5線），忽然縮程，可能更啱。

第4場　第五班（40-10分）1600米草地

　　「嘉寶神駒」及「大衛金剛」係五班中程一線馬，除非突然走樣，計能力，三甲分子。

　　「年年如意」冇手影捉可言，計時間表係差唔多了，大冷可考慮。「封面」跑法太被動，C欄唔易喺直路反撲。「帝皇福星」上場轉配件成績衰咗，早段迫極都唔快，演出幾失望，如轉路程可連前跟力亦改善，則有變數。「金玉之光」上場唔再慢閘，末段唔係塞過及遲撻着，可能有P，推算加程更佳。

第5場　第四班（60-40分）1400米草地

　　「薄荷糖」上1600米即贏，外叠亦冇影響，所以，唔好介意贏得險。「大地王者」縮落短途冇意思，正頭正路跑中程，四班總有出頭機會。

　　「寶德」和「同感」冇欄對發揮有一定影響。「真奇寶」季內跑田草多場，其實係得前仗忽然冇影，大圍計，算交得準。

　　「信賴」轉配件及加程，有埋內檔之助，有權唔同晒。

第6場　第四班（60-35分）2200米草地

　　「高明威威」長期陣上爆一段，惟喺都爾手上經常跑得蝕，換人有期望。

　　「太陽奇妙」及「暖在心頭」，近績出色，中置跑法也啱形勢。

　　「飛騰」長途馬再加程會有幫助。「壽比南山」分數已跌回上季第二捷水平，已有危險。「幻想家」如果冇馬放，前中段慢鬥慢，佢最着數。

第7場　第四班（60-40分）1650米泥地

　　「金瑞」寄望用韋達，發揮唔似得柏寶，如沿路肯置於生位，出來效果會同上場不一樣。「童夢」跑到脫口，上場唔輸就奇，惟前仗好歹係打低好準嘅「俊威威」，隔1仗又可能返嚟。

　　「飛魚駿王」12檔，好難會有3仗前際遇，但此場好似佢咁穩定嘅馬唔多，拖住。「天寶之威」評分漸有伸展空間，開始要跟。

第8場　第三班（80-60分）1000米草地

　　「鷹之團」贏馬過程易到痺，只要傷患唔搞搞震，二班上梗。「勁闖駒」星味不及前駒，係前速及路程性能可靠。

　　「正白旗」唔易留力，加頭罩及縮程，有針對性部署。「喜萬家」剛賽全程冇走位可言，一直置於中間三叠，返到嚟唔斷，或是復甦先兆，大冷門在此。「喜盈門」和「清新空氣」一對徐廐馬，前駒入P機會略高。

第9場　第三班（85-60分）1200米泥地

　　「大把在手」季內此程有晒交代，冇分利亦要重視。「聖迪達」耐冇出，又冇大閘，仲要一再缺課，但卡士真係高。

　　「特好」和「太陽昇」，前駒降班，而後駒新勝，可拖。「精彩生輝」轉到泥地，級數比大部分對手高。「駿蹄飛」外檔擔心會發揮得冇咁好。「沙紙」與「神殿」最多爭三三四四。

第10場　第一班（105-80分）1650米泥地

　　「皇帝旨令」前仗用嚟行頭，跑落符合預期，今場位靚，大有機會賺到更得。「喜威寶」泥地演出向來唔錯，如此場步速唔快，佢守好位會着數。

　　「千杯不醉」狀態未去番最好水平，但評分卻已回番唔少。「經典皇牌」外地有膠沙地賽績支持，匆出亦試過跑得好，呢次無端端咁樣部署，唔似試腳。「聖法理」如睇過上場澳港盃走勢，呢程可能比1200米仲正！

馬會賽馬節目主持　洪禮賢