洪禮賢講馬：加州財子締速驚人

港陌

　　第九場一班1000米草地。「加州財子」會唔會成為下屆國際賽短途錦標台柱，仍覺言之尚早，之不過，3歲仔跑4場贏4場，評分升穿100分，真係打針都冇咁快，佢內裏仲有幾多功力，好難設個上限，只係知道，呢場名義上係一班賽，實際水準與二班冇分別，對佢嚟講，根本係濕碎到唔恨。

　　佢贏4場究竟用過幾多成功力？就算喺賽事中亦唔可以好實在評估得到，除咗因為隻馬自己仍有犯錯地方之外，頭3場由於贏到對手埋唔到身，好難有指標性。以為上場末段略受考驗咩！？二馬「明燈」輸唔到1個身位畀佢，睇真啲，佢拉士按住韁造出55.56秒，刷新今季同程最快締速，姿態及時間勁都冇朋友。更重要係，復課後工序一如之前，又整課大閘至出賽（1200米泥閘大勝而回），有晒爭5W意願。

　　第十場三班1650米泥地。「漸信良駒」冇跑過泥地，冇試過泥閘，同父馬在港泥戰成績亦普通過普通，轉場地唔係冇凶險。但諗深一層，超過 1200磅嘅佢，噸位有晒條件跑泥地，加埋中置段段有跑法，喺泥地可會得到更理想發揮。而練者唔等下周三谷草一哩，無故安排隻馬「泥」試新野，由於此廐近季泥地頭馬唔多（近3季僅5W，上季跑49場冇馬贏），肯畀呢匹咁準嘅馬跑馬房弱項，未必係撞撞吓部署，單以呢點以及隻馬嘅往績，揀膽會預佢先。