洪禮賢講馬：劍鋒績靚 1檔仲正

港陌

　　第六場四班1650米。「劍鋒」喺四班負重，唔覺得有咩優勢存在，如果唔係排B欄1檔，又如果唔係同場冇乜馬放，基本上，眼尾都唔會睇吓佢，由於集集埋埋一忽忽有利條件，愈睇愈對佢有好感，但問心嗰句，唔會贊成買W，喺大彩池做馬膽則尚可。

　　「劍鋒」連搏幾場都贏唔到，質地係咁上下，但計佢整體賽績，就唔可以唔佩服，今季大大話話跑咗8場谷草賽事，除咗1場出唔到閘（放唔出），以及 1場亂放嘅賽事之外，冇1場唔喺前幾名，穩定性有幾強，賽績已「揚」晒出嚟；近仗係咪放快咗，抑或賽後驗出有腳傷，一樣入Q，此際狀態真係着晒火，再睇埋復課工序，冇點甩咳過，仲可在埋門撻課泥閘，假設喼到個「方」，喺今場大有機會放入一席。

魔幻大師食正形勢

　　第七場三班1650米。「魔幻大師」早於上賽前已指出，以現時進度，未追及評分升幅，要喺三班贏馬真係唔易，單睇近兩仗，做啱晒留放，冇話早段搶快咗，返到嚟都係三三四四，已經再冇藉口支持佢目前喺田草贏到，所以，唔等周末田草1400米，而改跑谷草，希望因應轉場而換批次級對手，意向完全可理解。由於今場會放嘅馬只得「心中有程」，如前段慢鬥慢，對主動跑法嘅佢，食正晒形勢，可能因此而提升能力。

馬會賽馬節目主持　洪禮賢