南美幫惡過土炮

魑魅魍魉

18/05/2011


巴西兵一向係葡超大戶，布拉加嘅成功就絕對要多謝班巴西兵，事關布軍一隊陣中有十二個巴西兵之多，仲多過葡萄牙土炮，其中以廿八歲前鋒洛迪高利馬最不可或缺，呢位左腳仔於歐聯分組賽表現神勇，成為大球會收購目標，另一巴西兵阿倫速度甚高，亦為波圖另一心腹大患。但講到布拉加最出名球員，當數葡萄牙左腳仔維亞拿，呢位前紐卡素及華倫西亞中場於布拉加搵到第二春，唔少fans都戥佢高興。


哥倫比亞兵撐起波圖


波圖自○四年歐聯後冇再喺歐洲賽威過，不過波圖絕對稱得上歐洲最成功球會之一，事關佢哋近年進行過多宗低買高賣交易，迪高、保羅費拉拿、卡維奴、比比、保辛華、路爾斯干沙利斯、利辛度盧比斯、魯爾梅利斯及般奴艾維斯等為球會帶來豐厚利潤，而下個重磅交易好大機會係前鋒法卡奧。




其實今季波圖起飛，多得一對哥倫比亞國腳法卡奧及古亞連。廿五歲嘅法卡奧最強殺着係頭槌，於今屆歐霸盃已破紀錄地射入十六球，盛傳祖雲達斯、熱刺及曼城均有意將佢收歸旗下；廿四歲中場古亞連今季上陣超過四十場射入十球，無論體能及入球能力於葡超均殺晒。最後不得不提巴西前鋒侯克，呢位重炮手紀律雖然麻麻，但射門欲超強，每場賽事至少要射十腳波先夠皮，大家今晚記得睇佢點表演啦！