少帥決紅褲子Vs學院派

魑魅魍魉

18/05/2011


歐霸盃決賽兩支葡軍均由少帥執教，波圖教練保亞斯現年只得卅三歲，若然捧盃將成為歷史上最年輕歐洲冠軍教頭；布拉加主帥杜明高斯紅褲子出身，係九十年代波圖及葡萄牙國家隊主力前鋒，外形瀟灑，同保亞斯一樣都好多fans o架！


33歲保亞斯創葡超奇迹


保亞斯係莫連奴徒弟，兩人曾於國際米蘭共事，及後保亞斯單飛，返葡萄牙教科英布拉大學取得佳績，去年七月就被委任為波圖主帥，之後就不斷創出新紀錄。波圖於今季聯賽未輸過，以廿七勝三和佳績提早五輪封王，成為葡超採三十場制後成績最佳球隊；而拋離次席賓菲加廿一分亦為葡超史上冠軍與亞軍最大差距，另外波圖於歐戰取得十三場勝仗，亦係球隊史上單季最佳成績。保亞斯現已成為全球最炙手可熱主帥，難怪連車路士都對呢名年僅三十三歲葡萄牙少帥流口水，有意請佢代替安察洛堤執教，如果成事的話，保亞斯就仿似行緊莫連奴條舊路，「莫帥二世」絕對當之無愧。




布拉加教練杜明高斯現年四十二歲，做球員時係波圖九十年代標誌性人物，亦是在該隊退役，○五年開始曾執教波圖B隊、利亞拿同科英布拉大學，於兩年前執教布拉加後聲名鵲起，09/10球季爆冷取得聯賽亞軍，並打入今季歐聯分組賽，依家殺到入歐霸盃決賽，執教功力毋庸置疑。雖然波圖係杜明高斯一生最重要球會，但今次決賽相遇，相信佢亦唔會手下留情。