布拉加突擊大有睇頭

魑魅魍魉

18/05/2011
文： Wendy

波圖主帥保亞斯才華真係令我着迷，佢冇乜踢波經驗，但就鍾情做足球教練，十幾歲時同前英格蘭國家隊領隊卜比笠臣係鄰居，而佢同莫連奴一樣咁有語言天分，細細個已經講到一口流利英文，所以當時教緊波圖嘅卜比笠臣咪好鍾意同佢傾偈囉！原來保亞斯嗰陣已經立志要成為足球教練，早喺十七歲考到歐洲足協嘅教練C牌喇。


波圖以攻代守


其實保亞斯被邀請教波圖之前，上季帶過另一隊葡超球隊科英布拉大學。當時「科大」七場聯賽未開齋排榜尾，會方於是試搵保亞斯返嚟碰吓運氣，點知佢真係將隊波從火坑中救番，仲帶領球隊殺到入聯賽盃四強添！




保亞斯今季帶波圖攞葡超冠軍，進攻戰術暫時無敵手，歐霸四強及八強對住維拉利爾及莫斯科斯巴達都能夠入到五球，不過波圖後防只有一般葡超質素，唔係好掂，所以惟有以攻代守，而波圖近九次對布拉加亦有七勝，呢場贏面好大。




布拉加能淘汰利物浦、賓菲加都唔係小嘢，佢哋興玩死守然後突擊，中場維亞拿策動畀波前面嘅洛迪高利馬及阿倫都幾煞食。縱使整體實力唔及波圖，但我認為佢哋有力入波，我鍾意入球大同埋主勝。