慕遜加柏贏波拔頭籌

猪拉多纳

19/05/2011
文： Mic少

德甲護級附加賽首回合，慕遜加柏主場迎戰乙組波琴，慕軍畢竟係甲組兵團，而且季尾愈戰愈勇，近六次主場出擊取得五勝，護級鬥心十足，今仗當然要把握地利，爭取先下一城。波琴質素參差，首回合輸少當贏。（有線61台周五凌晨2時30分直播）




慕遜加柏搞到要踢護級附加賽，主因係上半季成績太差，首十七場聯賽只得兩勝，但歇冬後知恥近乎勇，最後四場聯賽更取得三勝一和只失一球，包括擊敗冠軍多蒙特及前列分子漢諾威。球隊目前狀態及士氣可謂處於全季最高峰，難得從包尾反彈，取得附加賽資格，而且對手只係德乙第三位波琴，慕遜加柏梗係要乘勝追擊，爭取留在德甲。




波琴上季仲喺德甲比賽，今季降落德乙之後表現唔算特別標青，季尾表現仲一度走下坡，直至最後三場連贏三支踢緊風流波嘅對手，先勉強保住附加賽資格。


波琴越級挑戰先求不失


另外，波琴射手鄭大世受傷提早收咧之後，球隊少咗個重要攻擊點，往往要靠中場費達歷高後上入波，由於今仗越級挑戰，估計費達歷高唔會上得太前攻擊，而且首回合作客亦唔需要太冒進，只要唔大敗，次回合返回主場仲有價講。預料波琴會採取較防守戰術，但久守必失，難以抵擋近六次主場五勝嘅慕遜加柏。