棟悉先機：氣定神閒田戰攞A

港陌

　　可能天熱，阿棟今期特別「熱」情，本來打算貼晒3匹摩廐馬「包裝選擇」、「讚惑」及「紅旗勇將」。因為索到料，呢期大摩會有「嘭嘭聲」嘅攻勢，可唔可以繼4月尾那期中三元咁威水，當然唔敢寫包單，「風」就吹行晒嘞！不過，由於個人對「氣定神閒」同樣看好，所以，貼少隻大摩嘅馬。

　　第三場二班2000米。「包裝選擇」近兩仗贏過嘅對手，數幾隻夠了，「新希望」、「喜蓮智星」、「威利旺旺」、「旺國手」呢批馬之中，及後成績最差都至少有兩P到手，後兩駒更贏埋，賽績有幾勁，大家已心中有數。如果連勝搏散咗，我冇說話好講，假如喼到狀態，降入二班跑，又唔係特別重磅，邊可能會唔喺三甲，一於繼續追。

　　第四場四班1400米。「氣定神閒」上次轉倉初出，我都唔敢將佢放在正選，點解？因為賽前有樣嘢想不通，但並唔係泥地的問題，而係路程，1200米擺明係短，所以，上場跑輸咗，我當係一課大閘就算，名次及所負距離有幾多，不需太着意。今仗肯正正常常重返田草中程，A欄長直路追啲，如交回之前中程的爆發力，直路冇咩馬夠佢衝。

紅旗勇將大場仲正

　　第六場三班1200米。「紅旗勇將」上賽前已指出，係龍係蛇會睇多鋪，阿棟無意認叻，只係就算幾有前景嘅馬都好，初出之役，或有好多嘢影響到，如場地、環境等等，而事後睇番佢初出跑得衰，明顯係場地慢關係。今場次來到田草，大場性能不詳，但根據上場沿路走位，直路長應會有利無害。

點買法

　　由於過四關太犯本，W過三關算啦，「包裝選擇」、「氣定神閒」及「紅旗勇將」是也，因賠率比較熱，買3 x 4夠了。連贏及三重彩重心場次，揀第六場，配腳除了２、１２、１４，尚可加入４、８。

資深評馬人　陳華棟