馬主論戰

港陌

羅馬奔騰熱夠身

　　文家良剛啱憑兩匹「歐洲」系馬起孖兼捧盃，手風真係好順，話唔定今日都有馬贏。推介第九場「羅馬奔騰」，上場轉倉初出響1400米後上如箭跑第四，熱過身後估計今次會跑得更好，有權贏馬。另外鍾意第二場「綠駿群英」，轉東廐後跑過六場，結果全部有獎金收，演出真係好準，跑番田草1800米會更啱佢發揮，勞愛德亦已騎慣騎熟，坐位望贏。

張敬山

飛快威隨時反彈

　　告東尼剛啱贏完「魔幻大師」之後，已經拋離大摩五W，響呢個關鍵時刻一定會乘勝追擊，我睇好佢繼續有馬贏。推介第六場「飛快威」，雖然今季只係跑過兩次第三，但一再展現出唔錯後勁，評分已經比初來港時減咗九分，應該係時候反彈。另外鍾意尾場「快人快語」，雖然以往響谷草先跑得好，但前仗響沙田追近「勁飛寶」跑第四，反映大場都啱跑，要吼實。

任達華

傑出君子四班惡

　　剛啱何澤堯憑「旺國手」同「動力網絡」起孖兼捧盃，呢位後生仔真係騎得吓，今日佢胯下都有唔少惡馬，隨時又有頭馬見面。

　　鍾意第三場「較量」，近四仗贏咗三場，五歲馬今季至大熟大勇，增程跑2000米一定啱發揮，隨時可三連捷。

　　另外，第四場「傑出君子」都要留意，一再證明響四班惡氣十足，今季仲未贏馬交代，唔使講一定搏盡，值得捧場。

寇鴻萍、梁廷鏘