高清睇跑馬：續領風騷贏面大

港陌

　　「包裝選擇」今季一出即勝，打後五戰卻得個近字，大摩一於變招，跑完大前仗休戰近兩個月，結果前仗於總場次485復出，即在田草1600米跑出快時間贏馬，除輕磅的「新希望」畀佢較多威脅外，季軍及打後馬全部輸到離行離列。勝後上仗小休近一個月再建功，由三班跳上一班贏谷草2200米，再睇贏馬過程，只見牠沿途守在好位，入直路後即交出強勁衝刺姿態討好，蹄下敗將「威利旺旺」再出贏皇太后盃，季軍「旺國手」剛戰亦補中，足證又已唞夠上陣的「包裝選擇」，直落三W乃意料中事。

　　另外，「續領風騷」前仗初出票數硬淨，可惜該場一班1400米步速唔算快，僅得廐侶「傾力之城」快放，形勢不利後追下只得亞軍，但跑出1分21 秒86擺明質素高。上仗於總場次578轉戰二班同程，大熱補中理所當然；影相險勝看似驚險，但跑出1分21秒74，時間比前仗更快，而且直路由內檔移出外檔，相對「家樂飛」一直走二叠，兩駒際遇不同仍能贏馬，而準繩好馬「陽明深心」也未能威脅，可見賽事水準之高；這次「續領風騷」增程必合，乃信心之選。

Sam