賠率有路捉：落班有飛呼風喚雨

港陌

　　通常星期六作賽，大家都會預爆到七彩，但噚日睇飛，竟然搵到三大重心出嚟，佢哋分別係爭緊冠軍練馬師的告東尼同大摩，以及騎師榜二哥柏寶。除咗第一場同第八場，大熱門統統同以上三人有關，真係咁正路定係因為傳媒炒作？不得而知，希望唔好令大家失望至好。

　　第二場五班1800米有匹馬睇飛數幾吸引，佢就係「呼風喚雨」，呢隻馬今次個W堅係熨，得6倍成為次熱門，睇番佢對上三仗最後賠率，至少都有 23倍，呢鋪賣到咁熱，應該同落五班跑有關。望番近績，佢呢季真係麻麻哋，跑九場至叻都係得第三，講真狀態真係冇，只能靠底質取勝，好彩，佢上季試過五班作賽，四次都有獎金，證明喺此班真係叻仔嚟，既然有人大手購入，不妨又信一信。

小注博潘頓封王

　　騎師王方面，未睇賠率之前，筆者估賠率應該由白德民同柏寶擔起晒啦啩，因為多匹熱門都關佢哋事。誰知結果出乎意料之外，二人當中，得白德民正路啲，有2.4倍。柏寶唔係話唔好，但有3.2倍咁好分，你唔好話唔驚。相反潘頓賠率有4.75倍，嗰手馬雖然唔及兩位大哥，但「豐衣足食」、「堅旺財」、以及「一路順風」等等都係好嘢，賠率同坐騎啱晒比例，一個唔該真係開佢，買注穩陣。

周仲