洪禮賢講馬：一團威唔好睇低

魑魅魍魉

　　第六場四班1800米。「善風」之前數仗跑法冇大錯，路程又唔係唔啱，成績卻冇大起色，係去到上賽田草2200米，交出應有能力，輸頸位畀「不老傳奇」，而跑贏「高明威威」。係咪完全因開縫眼罩效果，或佔一部分，評分有水位，同埋，經過幾場回一回，亦可能係成績止跌因素。

　　從近季賽績顯示，佢成日可以打叠好，就以季內為例，首次入P後，翌仗唔上名都得殿軍。而12月尾「善風」喺田草2000米入Q，跟住嗰場縮程兼轉場（谷草1650米），一樣跑到第二名。

　　係部署手法？還是馬性襟搏？唔會去分清楚，只知C欄排好檔，加上跑法機動，已踏出成功一大步。但老老實實，如博W可能太樂觀（超過兩年冇贏過），博佢再入三甲，則大條道理。

　　第七場三班1650米。「一團威」喺三班草地賽好少跑得唔好，試過兩場冇前列咋，有1場因為心律不正，另1仗則賽後有煩躁不安及輕微腹絞痛迹象，即係話，健康冇問題，佢喺呢個班係好有「牙力」。自從放完草之後，跑兩場冇影，前仗曾受馬鞍滑移影響（其實直路騎過冇乜反應）；上場泥地短途則唔係輸得遠，直路頭總算有兩腳。今仗回到谷草一哩，路程比上場啱得多，如經過兩場賽事重新跑起，今仗換上柏寶，料會跑得好好睇睇。

馬會賽馬節目主持　洪禮賢