誠信破產 意甲拍蚊

魑魅魍魉

24/05/2011
文： SAMVO肥叔

英超煞科生意好到不得了，雖然西甲水平同英超叮噹馬頭，但講到投X額真係遠遠追唔上，目前四大聯賽嚟講，英超投X額獨佔鰲頭，德甲因開波時間好，加上呢一、兩年水準上升，同西甲投X額不遑多讓，反而意甲千瘡百孔，默契波太多，投X額急跌。




好似前晚英超同意甲一齊煞科，英超成為球迷焦點，但意甲卻靜英英冇人理，主要原因係意甲季尾波特別離譜，已降班嘅巴里作客竟可大勝博洛尼亞四比○，莊家都怕咗佢，部分莊家調低水位及投X額，有啲甚至索性唔開盤，就算大戶想買都攞唔到貨。




英超情況就完全唔同，煞科戰大戶重注買曼聯同熱刺，結果曼聯上盤同大盤都大獲全勝。今季英超相當精彩，但肥叔預期下季競爭會更激烈，因為曼城已「升呢」，利物浦買完安祖卡路爾及蘇亞雷斯呢一剛一柔組合威力大增，加上車仔炒安察洛堤後隨時大翻身，下季英超肯定鬥到甩髀！


西甲提早開波搶地盤


肥叔聽聞西甲下季開賽時間會提早，希望可爭亞洲市場，同英超爭一日之長短，肥叔認為係好事，畢竟依家亞洲市場先係菠菜界主流，單係一個省嘅投X額已遠遠高過歐洲一個國家，相信歐洲球壇亦會順應呢個趨勢，到時菠菜市場定必更百花齊放。