棟悉先機：多益善減磅出擊

港陌

　　今日可能有幾陣雨，咩時間會落，跑馬前，抑或散場後，只有天知，但阿棟只知今賽係跑C欄，正常場地已不利後上馬，落多兩滴雨的話，除非啲馬好擅打水戰，不然，往績叻到點也徒然，只要係後上馬，表現一定打折扣，信不信由你。

　　第二場三班1200米。「銘記心頭」C欄1檔，未跑已贏了形勢，睇過此馬近兩場表現，三班唔係咁有本事，實力在中下級，好彩今場有讓磅優惠幫一幫，對手又買少見少，部分更加唔係谷草短途材料，希望在遇到弱旅之情況下，可以把成績提升。

金瑞啱杜利萊發揮

　　第六場四班1800米。「金瑞」在港未嘗一勝，阿棟真係為佢換咗幾副眼鏡，佢曾經輸少少畀「十足十」，喂，人哋在四班已兩W到手，佢不但未贏，近兩仗更跑到P都冇，唔知發生咩事，唔通泥地一哩跑落唔啱，我就唔多清楚！今仗吸引我再揀佢，原因係鞍上人，換回杜利萊，大前仗力拼僅敗的配搭，可能此馬要呢類騎師先可收服。

　　第八場二班1200米。「多益善」上場輸少少返嚟，其實算好叻，連續3場賽事要負132磅或以上，你估隻馬係機器！陣上負重用力都用多啲，可以一一名列三甲，體能及質素缺一不可。今仗轉到1200米一試，合適與否，要再跑至知，因目前跑法與初出時已略有不同，能力稍稍提升了。而如果負磅大減真係幫到忙，一席位置應該幾穩陣。

點買法

　　由於「金瑞」強配關係，感覺上較推介嘅另外兩駒優勝，博W會揀佢。至於QT，揀第二場，因為馬少少場合希望易啲拆局，「銘記心頭」做膽，腳拖２、８三重彩則可兼顧３、７！

資深評馬人　陳華棟