馬主論戰

港陌

團隊精神謀交代

　　徐雨石今晚出馬唔多，但我睇佢應該有馬贏，最啱心水係第二場「團隊精神」，今季跑咗14場只得兩場亞軍，仍然未交代，今次用到史卓棟操刀，睇嚟都想趁季尾盡快贏番場，可以一吼。另外推介第六場「精密紡」，近五仗跑谷草中距離，合共取得兩冠三亞，演出真係準，而且跑法夠晒機動，今次排三檔進可攻退可守，黎海榮騎慣騎熟，應該穩入前列。

張敬山

雙妙星縮程橫掃

　　史卓棟今季贏親啲馬都有分頭，剛戰更加爆隻75倍嘅「愛心大使」，想食大茶飯真係要吼實佢啲坐騎。今晚佢只騎三駒，但都有一定實力，推介頭場「駕世鞍」，季內贏過「快馬當先」同「幸運來」，響五班惡氣十足，只要交出水準，唔驚任何對手。另外鍾意第四場「雙妙星」，依家已經轉型為短途馬，上仗跑一哩輸咗唔使介意，今次縮程兼負輕磅，隨時可掃晒。

任達華

大進演出夠準

　　谷草賽事，點都要吼實方嘉柏啲馬，尾場方廐有「開心風采」同「大進」雙龍出海，估計志不在小。兩駒之中，較為鍾意「大進」，今季跑過三次谷草 1200米，結果取得兩冠一亞，真係準到冇人有，吼準強項路程再上陣，一定鍊盡。另外推介第三場「聚有盈」，轉去方廐之後跑三場全部贏晒，真係唔到你唔服，今次升上三班一樣有得揮，隨時可以四連捷。

寇鴻萍、梁廷鏘