洪禮賢講馬：最佳孖寶自由勝開心駕到銘記心頭 御將軍聚有盈勁信心輕輕鬆鬆

港陌

　　谷草C欄賽事，如果今日落雨，對於前置及內檔馬，優勢便更大，尤其跑1200米，偏差會仲嚴重，真係唔易扭轉此模式。

重心場次　第8場　第二班（100-80分）1200米

　　「旅英駿駒」由一班田草，轉到二班谷草，跑低班半有多，因應整體對手實力跌幅，負重仍有着數；如果今仗唔再甩口，排2檔，做到咬好位跑法，應有三甲。

　　「步步快」及「讚賞」，一對新勝馬，跑法以後駒賺晒，但兩駒變化地性能則要估。「多益善」目前性能略變，1200米或比1000米更加啱追。

　　「好好彩」腳傷復出，之前贏大閘姿態easy，惟泥轉草，前速未必如一。「開心風采」上季尾有類似縮程安排（田草1400米縮落谷草1000米），唔使驚應付唔到。「高風格」及「六六精英」，評分早已摸頂，難再突破，除非淋地幫好多。

第1場　第五班（40-10分）1650米

　　「世世無敵」剛賽四班此程，沿路二叠放至最後百幾米才力弱，算係幾韌。跑完隔番夠日子兼做嘢（對上4仗賽前冇大閘），立心搏落班首戰。「駿馬飛騰」及「贏啲啲」，五班略超，前駒再加程有實際作用，後駒在前仗同程發揮蝕章仍有獎金，一併考慮。

　　「龍騰寶駒」和「迅者」，早段跑法積極，將可霸到好位，好大機會受惠，如計埋檔位，後駒較好。「燈胆寶」12檔唔怕，因前速喺五班略優異，只係怕地慢。

第2場　第三班（80-60分）1200米

　　「最佳孖寶」近仗跑法完全唔同，今仗又會點處理，好難估！？睇佢前仗A欄可放至最後幾十米先至冇P，若因地慢而又肯放，有權偷襲。「銘記心頭」與「自由勝」，前駒好位而後駒有質，正路腳。

　　「飛躍王子」2月及4月中曾腳傷，操練一再受影響，明知三班有級數都會介意。「團隊精神」和「開心駕到」，如一齊放，3檔嘅後駒，略有形勢。

第3場　第三班（80-60分）1200米

　　「御將軍」喺三班有時要逆來順受，好在1檔及地利，喺今場唔會冇發揮機會。「聚有盈」剛勝已稍有掹掹緊，希望上班負磅減，會有番之前兩勝嘅能力。

　　「勁信心」5檔肯搶，二叠亦蝕得起，如遇淋地仲啱。「田園名駒」一罩功成後，再冇咩把炮了。「輕輕鬆鬆」上場頭兩段46.12秒過快，今場馬少，若非又鬥搶，略為拖慢放，效果或唔同。「日月暉華」係驚近績梅花間竹！

第4場　第四班（60-40分）1200米

　　「超晒班」食正C欄1檔及前置跑法嘅條件，而之前大閘跑第二名，過程輕易又主動，有望開齋。「鑽飾彩虹」唔好介意上場大好形勢冇P，事關賽前曾傷腳，備戰有甩漏，寄望跑過1場，重現之前同程上名威力。

　　「賞蝦王」經歷大半季減了16分，落到四班，仲跑主項，點都有得爭。「多多昇」一再指出返唔到去盛時，係靠級數打拼。「質超駒」經常跑四至六名，排埋10檔，更慘。「鄉村傳奇」前仗蝕得多一樣追得吓（上場則四叠仲蝕），如換人令留放似番樣，或可入一席。

第5場　第四班（60-40分）1650米

　　「威力高」連田草亦可上名，賽績具跟進價值。有幸喺今場排到1檔，又返回谷草一哩，夠晒條件。「超勁精神」一直具咁上下水準，關鍵係場地慢唔慢。

　　「心路」和「安瑪」，啱啱喺同程，差唔多位置過終點，當時略嫌前駒早發力，後駒剛衰在前中段被迫愈褪愈後，若兩駒執番正晒取位，唔會輸得畀任何對手。「光芒四射」鍾意喺上場此程嘅表現，因肯轉膊，用守好位跑法而輸近，略有可塑性。

第6場　第四班（60-40分）1800米

　　「善風」好興打叠好，由於評分冇壓力，更加易辦事。從前曾在變化地得亞殿軍，今晚地慢都唔會影響到佢。「精密紡」、「康駿」及「中華寶寶」，好懷疑仲有冇分喺手，純粹係績穩先會諗。

　　「彩虹幻影」轉跑谷草1800米，已是最後留意藉口，再唔得，可能要評分進一步「質」低。「金瑞」好多時跑得好都喺出便，馬性可能係咁，唔合群！如果真係，用杜利萊最好，因佢通常攞位蝕多過賺。

第7場　第三班（80-60分）1650米

　　「一團威」三班往績靚，休出已跑兩場，如夠跑頭，今仗轉到一哩，到位。「成就美麗」草地實力唔會與泥地有好大距離，總之，唔好成日留得太後，唔難有番表現。

　　「傳奇快車」場地如起變化，隨時企喺度！「福喜」遇鬆軟地好跑，而上場一早擺喺三叠，唔輸至奇，換人有埋好檔，處理手法如肯改，效果可能好唔同。

　　「勝利駿駒」唔認為上場跑得啱，加上，本身變化地性能好，畀多次機會。

馬會賽馬節目主持　洪禮賢