鹿角硬淨唔赦首爾

港陌

25/05/2011
文： 蘇豪

亞冠盃十六強今日兩場日、韓對決，其中FC首爾主場對鹿島鹿角，首爾分組賽唯一敗仗係輸畀名古屋鯨魚，今次面對另一日職球隊面臨考驗。鹿角分組賽六戰不敗，演出硬淨，作客一樣不落下風，受讓平半捧下盤。 （now 671周三晚6時30分直播）




FC首爾今季於韓職演出麻麻，現時只位列中下游，雖然球隊擁有迪積佩洛夫、丹恩奴域及梅里斯奧摩連拿等優質外援，但整體發揮唔算好。相比之下，首爾於亞冠盃分組賽表現較佳，六戰只輸一場，但正正係輸畀日職球隊名古屋鯨魚，當時鯨魚殘陣出戰，以反擊戰術擊敗首爾，今次鹿角大可用番呢招。


小笠原滿男聯賽抖夠


鹿島鹿角分組賽六戰不敗，兩戰水原藍翼同樣打成平手，對住南韓代表完全不落下風。鹿角現時主要得中場中田浩二受傷，其餘主力都可候命，中場指揮官小笠原滿男上場聯賽抖夠，今次將會全力協助球隊爭勝。以波論波，兩軍級數接近，鹿角勝在亞洲賽經驗較多，今次去到淘汰賽階段較為着數。




兩軍○九年於亞冠盃十六強碰頭，當時鹿島鹿角於主場同FC首爾踢成二比二，最終互射十二碼落敗，今次決心復仇，作客有力保持不敗，受讓捧得過。賽制方面，十六強賽事一場過，九十分鐘賽和會進行加時，再和則互射十二碼分高下。