慕遜加柏守細波抗波琴

港陌

25/05/2011
文： Mic少

德甲護級附加賽次回合，慕遜加柏作客乙組仔波琴，慕軍首回合戰至補時入波，險勝一比○，而且進攻主將馬高列奧斯勇戰受傷，今場即使紮住頂硬上亦會影響發揮，令攻力受損，教練法夫爾應會改打守勢波，捧入球細。




（有線61及64台周四凌晨2時30分直播）




慕遜加柏首回合憑地利優勢圍攻波琴，但都要等到補時，先至靠後備入替嘅迪甘馬高入波，小勝一球，反映慕遜加柏攻力不足問題。屋漏兼逢連夜雨，進攻中場馬高列奧斯上仗開波不久就拉傷大腿，之後紮住繼續踢，但到比賽末段都係頂唔順被換離場，今場上陣成疑。




馬高列奧斯係慕遜加柏首席射手，無論係帶傷比賽或缺陣，都會對球隊進攻造成沉重打擊，既然球隊有一球在手，教練法夫爾應會加強防守，力保勝果。事實上，慕遜加柏季尾靠穩守戰術，頻頻搶分成功，近五仗只失一球，全部都開細。


波琴攻力乏善可陳


至於波琴亦非擅攻球隊，今季德乙三十四戰只入四十九球，比幾支中游球隊仲少。射手馬簡艾甸上仗表現乏善可陳，踢咗半場就被換走。雖然鄭大世已復出，但狀態仍然不足，波琴想強攻收復失地並唔容易，捧入球細啱數。